Vetura luksoze, qindra mijëra euro kesh, armë me dylbi e qese të tëra me dokumente financiare janë sekuestruar gjatë aksionit të madh të Prokurorisë Speciale të Kosovës, ku u prangosën nëntë persona të dyshuar për kontrabandë me derivate e shpëlarje parash.
Dyshimet e Gjykatës mbështeten mbi përgjime që zbuluan se si të dyshuarit modifikonin cisternat të cilat disa mbusheshin me naftë e të tjerat me ujë natyral, me qëllim që t’u shmangeshin detyrimeve doganore.
Sipas dosjes së Prokurorisë Speciale, në krye të këtij grupi të organizuar kriminal qëndron Faruk Mazrek.
Mazrek, së bashku me djalin e tij, Fariz Mazrekun, dyshohet se kanë përdorur biznesin e tyre të naftës “Po Petrol Fariz”, me seli në Mamushë, si mbulesë dhe pikë fundore për të futur në sistemin legal paratë e pista të fituara nga aktivitetet kriminale (ku përmendet edhe dyshimi për trafikim me narkotikë nga i kaluari i Faruk Mazrekut dhe fshehja e burimit të pasurisë përmes një emri të mëparshëm, Faik Mazreku).
Prokuroria i sekuestron 14 mijë euro kesh, arsenal kamionësh e vetura luksoze Mercedes
Gjatë bastisjes në shtëpinë e të pandehurit Faruk Mazrek në Mamushë dhe në fabrikën e bllokave “Şaşo Group” në Bokshiq të Klinës, Policia ka sekuestruar një pasuri të konsiderueshme:
Para të gatshme: 14,400 euro kesh (të ndara në kartëmonedha 4×500€, 25×200€, 15×100€ dhe 118×50€).
Vetura luksoze: Një Mercedes Benz C220 (i bardhë) dhe dy Mercedes Benz S-Class 350D 4Matic (të zinj).
Automjete të rënda: Pesë (5) kamionë dhe dy cisternë/gjysmërimorkio.
Pajisje elektronike: Një telefon iPhone 16 Pro Max.
Dokumentacion: Dhjetëra fatura të shitblerjes, fletëdërgesa dhe fletore shënimesh të biznesit “Şaşo Group”.
Ndërsa djalit të tij i sekuestrohen laptopë dhe vula
I pandehuri tjetër nga Mamusha, Fariz Mazrek, ka qenë cak i bastisjeve në shtëpinë e tij dhe në biznesin “Fariz Mazrek” B.I.:
Pajisje elektronike: Një telefon iPhone 16 Pro Max, një laptop Lenovo dhe një shtëpizë kompjuteri Lenovo.
Dokumente dhe vula: 55 foldera me dokumentacione, certifikata pronësie e biznesi, fatura, si dhe pesë (5) vula të ndryshme.
Dokumente të tjera: Dy foldera të kompanisë “Şaşo Group” dhe blloka shënimesh.
Në të njëjtin lokacion në Mamushë, Policia ka bastisur edhe të pandehurin Muhamet Mazrek:
Veturat: Një Mercedes Benz C220 d4Matic (ngjyrë e bardhë/e zezë) dhe një Nissan Navara (ngjyrë e zezë) së bashku me çelësat.
Pajisje elektronike: Një telefon celular iPhone 17 Air.
Prova të tjera: Një fletë e formatit A4 me shkrim dore.
