Para aksionit të Prokurorisë Speciale, “Veda 2 Petrol” ishte dërguar për gjykatë edhe për abuzim me çmime të naftës

Një operacion i gjerë i Prokurorisë Speciale dhe Policisë së Kosovës më 1 korrik kishte goditur një rrjet të organizuar të kontrabandës dhe shmangies tatimore me derivate, ku mes të arrestuarve është edhe Dashnim Miftari – pronar i kompanisë “Veda 2 Petrol”. Sipas dosjes së prokurorisë, këta persona për vite me radhë, kanë kontrabanduar me naftë nga Shqipëria në Kosovë, duke iu shmangur kontrollit doganor.

Ky problem ligjor për “Veda 2 Petrol” të Dashnim Miftarit nuk është rast i izoluar. Kjo për shkak se më 24 prill 2026 Inspektorati Qendror i Mbikëqyrjes së Tregut kishte filluar procedurë kundërvajtëse në Gjykatën Themelore në Prishtinë ndaj “Veda 2 Petrol” për shkak të shkeljes së Ligjit për Tregtinë me Produkte të Naftës.

Kjo kërkesë për fillimin e procedurës kundërvajtëse ishte bërë për shkak të të gjeturave me rastin e inspektimit të bërë në “Veda 2 Petrol” më 3 prill 2026, ku ishte konstatuar shitja e derivateve të naftës mbi marzhën e lejuar.

Veriu.info ka siguruar këtë kërkesë të IQMT-së me numër protokolli 1701, në arsyetimin e së cilës thuhet se kjo kompani ka tejkaluar marzhën tregtare maksimale të lejuar për shitje me pakicë të derivateve të naftës.

“Veprim ky në kundërshtim me nenin 15 të Ligjit nr. 08/L-018 Për Tregtinë me Produktet e Naftës dhe Karburanteve të Ripërtërishme, i sanksionuar me nenin 19 paragrafi 13 të po të njëjtit ligj dhe në nenin 26 të Ligjit nr. 06/L-034 Për Mbrojtjen e Konsumatorit dhe ndëshkohet me nenin 137 të po të njëjtit ligj”, thuhet në arsyetimin e kërkesës për fillimin e procedurës kundërvajtëse të bërë nga IQMT.

Sanksionet e nenit 19, paragrafi 13

Për shkelje të vendimit për marzhën e fitimit maksimal, në kërkesë thuhet se sanksioni është paraparë me nenin 19, paragrafi 13 i Ligjit nr.08/L-018 për Tregtinë me Produkte të Naftës dhe Karburanteve të Ripërtëritshme.

Sipas paragrafit 13, dënimi maksimal për persona juridikë është i paraparë në shumën prej 6 mijë euro.

“Kushdo që, në kundërshtim me nenin 15 të këtij ligji, nuk respekton kufizimin e çmimit të produktit të naftës ose karburantit të ripërtëritshëm dënohet me gjobë prej dy mijë (2.000) deri në gjashtë mijë (6.000) euro, si person juridik”, thuhet në paragrafit 13 të nenit 19 të Ligjit nr.08/L-018.

LEXONI EDHE:

Dosja e Prokurorisë: Pronari i ‘Veda 2 Petrol’, Dashnim Miftari dyshohet si pjesë e grupit të organizuar kriminal – kontrabandë me naftë e pastrim parash

Me pranga në duar, Dashnim Miftari – pronari i Veda 2 Petrol sillet në gjykatë

Pronari i “Veda 2 Petrol”, Dashnim Miftari është arrestuari në aksionin kundër grupit të strukturuar kriminal naftëtarëve