Në Gjykatën Themelore në Prishtinë po mbahet seanca për caktimin e masës së sigurisë ndaj disa të dyshuarëve për kontrabandë me naftë, të cilët u arrestuan gjatë aksionit të Prokurorisë Speciale të Kosovës më 1 korrik.
Veriu.info ka siguruar kërkesën për caktimin e masës për paraburgim të bërë nga Prokuroria Speciale në Gjykatën Themelore në Prishtinë, ku zbardhet skema e këtij grupi të strukturuar kriminal, që dyshohet për kontrabandë, shmangie tatimore e pastrim parash.
Në kërkesën për caktimin e masës së paraburgimit për nëntë të arrestuarit, është edhe pronari i kompanisë “Veda 2 Petrol” Sh.P.K. Dashnim Miftari, i cili dyshohet për veprat penale të pjesëmarrjes ose organizimit të grupit kriminal të organizuar, shpërlarjes së parave, kontrabandimit të mallrave në bashkëkryerje dhe shmangies nga tatimi.
Lexoni edhe:
Sipas dosjes së prokurorisë, Dashnim Miftari, Adem Morina e Muhamet Mazrek më qëllim të përfitimit të drejtpërdrejt të dobisë financiare, kanë vepruar brenda grupit të strukturuar kriminal në krye të të cilit ka qëndruar Faruk Mazrek, duke kryer krime të rënda të kontrabandimit të marrave.
“Muhamet Mazrek ka qenë i angazhuar në transportin, modifikimin e mjeteve transportuese, mbajtjen e kontakteve mes anëtarëve të grupit, i pandehuri Dashnim Miftari, si pronar i biznesit “Veda 2 Petrol SH.P.K” dhe Adem Morina si pronar i “Cini Oil SH.P.K” gjatë ushtrimit të veprimtarisë ekonomike, së paku nga janari i 2025 vazhdimisht kanë deklaruar importin e sasive të mëdha të naftës për bizneset e tyre, përmes portit “Porto Romano” të Durrësit, ku kontrabandimin e ka organizuar i pandehuri Faruk Mazrek, ndërsa ashtu që mjetet transportuese të të pandehurit Faruk, të regjistruar në emër të shtetasve të Shqipërisë, në Shqipëri janë ngarkuar me vetëm 20 % të sasisë së naftës ndërsa sasinë e mbetur të naftës i pandehuri Faruk ua ka shitur në mënyrë të kundërligjshme bizneseve në Shqipëri, ashtu që vijën kufitare të Kosovës autobotet e kanë kaluar duke shmangur kontrollin doganor në atë mënyrë që brenda tyre dhoma ndarëse me naftë ka qenë e ndarë nga dhomat tjera, të mbushura me ujë”, thuhet në dosjen e prokurorisë për këta të pandehur, të cilët me këto veprime dyshohet se kanë kryer veprën penale pjesëmarrja ose organizimi i grupit kriminal të organizuar.
Dashnim Miftari, Faruk Mazrek, Fariz Mazrek, Skender Kelmendi, Nister Bajraktari, Adem Morina, Muhamet Mazrek dhe Naser Morina, dyshohen se janë përfshirë në kryerjen e veprave penale të shpërlarjes së parave nga muaji janar 2020 e deri më tani.
Prokurorja Speciale Arbëresha Shala, e ngarkon Dashnim Miftarin e “Veda 2 Petrol” Sh.P.K. edhe me përfshirjen në grup të organizuar kriminal për lëshimin dhe përdorimin e dokumenteve të rrejshme, në atë mënyrë që kanë lëshuar fatura fiktive për blerje apo shitje të mallit.
LEXONI EDHE:
Abuzim me çmimet e naftës në kohë krize: Shteti e çon në gjykatë EX FIS-in e Isa Muharremit
Dallavere me çmimet e naftës: Lab Oil i Raif Gashit përfundon në gjykatë (Dokument)
