Argjentina mund të përballet me masa disiplinore nga FIFA, pasi disa prej lojtarëve të saj shfaqën një pankartë me mbishkrimin “Ishujt Falkland janë argjentinas”, pas fitores 2-1 ndaj Anglisë në gjysmëfinalen e Kupës së Botës.
Kampionët në fuqi të botës përmbysën rezultatin falë golave të vonshëm të Enzo Fernandezit dhe Lautaro Martinezit, duke siguruar finalen kundër Spanjës, e cila do të zhvillohet më 19 korrik në stadiumin “MetLife”, në zonën e Nju Jorkut dhe Nju Xhersit.
Megjithatë, festa e argjentinasve është shoqëruar me polemika, pasi pankarta me mesazhin politik mund të konsiderohet shkelje e rregullores së FIFA-s.
Polemika për pankartën pas ndeshjes
Disa lojtarë të Argjentinës u fotografuan duke mbajtur një pankartë me mbishkrimin në spanjisht “Las Malvinas son Argentinas”, që do të thotë “Ishujt Falkland janë argjentinas”.
Ishujt Falkland ndodhen rreth 480 kilometra larg brigjeve të Argjentinës dhe afërsisht 13 mijë kilometra nga Britania e Madhe. Sovraniteti mbi ta vazhdon të jetë objekt mosmarrëveshjeje mes dy vendeve.
Në vitin 1982, Argjentina pushtoi ishujt, por pas një konflikti dhjetëjavor, forcat britanike rimorën kontrollin.
Gjatë luftës humbën jetën 655 ushtarë argjentinas, 255 pjesëtarë të forcave britanike dhe tre civilë.
Reagon qeveria britanike
Pas shfaqjes së pankartës, zyra e kryeministrit britanik reagoi me një deklaratë të drejtpërdrejtë.
“Kupa e Botës mund të mos jetë e jona, por Ishujt Falkland padyshim që janë”, thuhej në reagim.
“Qëndrimi ynë nuk ka ndryshuar. E drejta për vetëvendosje u takon banorëve të ishujve. Përkushtimi ynë ndaj Falklandit nuk do të lëkundet kurrë.”
Zëdhënësi i qeverisë britanike shtoi se kryeministri Keir Starmer beson se FIFA duhet të hapë një hetim për sjelljen e lojtarëve argjentinas.
FIFA po shqyrton raportet e ndeshjes
Një zëdhënës i FIFA-s konfirmoi se Komisioni i Pavarur Disiplinor po analizon raportet dhe rrethanat e incidentit.
“Siç ndodh zakonisht, Komisioni i Pavarur Disiplinor i FIFA-s po shqyrton raportet e ndeshjes dhe rrethanat përkatëse, përpara se të vendosë nëse do të ndërmerren hapa të mëtejshëm në bazë të Kodit Disiplinor të FIFA-s”, thuhet në reagim.
Neni 34.3 i rregullores së Kupës së Botës ndalon shfaqjen e mesazheve ose sloganeve politike, fetare apo personale nga lojtarët dhe zyrtarët përpara, gjatë dhe pas ndeshjeve.
Ndalimi vlen edhe gjatë himneve kombëtare, seancave stërvitore, konferencave për shtyp dhe aktiviteteve të tjera zyrtare të organizuara nga FIFA.
Argjentina ishte gjobitur edhe në vitin 2014
Argjentina është ndëshkuar edhe më parë për një veprim të ngjashëm.
Në vitin 2014, FIFA e gjobiti federatën argjentinase me rreth 20 mijë paund, pasi skuadra shfaqi një pankartë të ngjashme përpara një ndeshjeje miqësore kundër Sllovenisë.
Në atë rast, FIFA e cilësoi gjestin si shkelje të rregullave për mesazhet politike dhe sjelljen e papërshtatshme të skuadrës.
Lojtarët pretendojnë se pankarta u hodh nga tifozët
Mbrojtësi i Argjentinës, Gonzalo Montiel, deklaroi se pankarta nuk ishte përgatitur apo sjellë nga lojtarët, por ishte hedhur në fushë nga tribunat.
“Tifozët e hodhën nga tribuna dhe djemtë thjesht e morën”, deklaroi ai për mediat argjentinase.
Edhe gazetari Nelson Castro dha të njëjtin version.
“Dikush e hodhi në fushë dhe më pas ua dhanë lojtarëve”, tha ai.
Mbetet e paqartë nëse fakti që pankarta dyshohet se erdhi nga një tifoz, dhe jo nga një lojtar apo anëtar i stafit, mund të shërbejë si rrethanë lehtësuese në rast se FIFA vendos ta ndëshkojë Argjentinën.
Reagon edhe qeveria e Ishujve Falkland
Qeveria e Ishujve Falkland kërkoi që FIFA të ndërmarrë masa, duke e cilësuar pankartën si të papërshtatshme dhe të pandjeshme.
“Qeveria e Ishujve Falkland është e zhgënjyer, megjithëse fatkeqësisht jo e befasuar, që kombëtarja argjentinase vendosi ta njollosë rezultatin e gjysmëfinales së Kupës së Botës, një ndeshje që nuk kishte asnjë lidhje me Ishujt Falkland”, thuhet në deklaratë.
Në reagim përmendet gjithashtu pushtimi i vitit 1982 dhe pasojat traumatike që konflikti la te shumë banorë të ishujve.
“Pankarta e shfaqur nga Argjentina ishte veçanërisht e pandjeshme për shumë njerëz në Falkland.”
Qeveria lokale theksoi se politika nuk duhet të përfshihet në sport dhe se banorët e ishujve nuk duhet të përdoren si temë politike sa herë që përballen Anglia dhe Argjentina.
“Shpresojmë që FIFA ta përmbushë premtimin për ta mbajtur politikën jashtë sportit dhe ta ndëshkojë çdo sjellje të tillë në përputhje me rregullat e veta”, përfundon deklarata.
Tashmë pritet vendimi i Komisionit Disiplinor të FIFA-s, ndërsa mbetet për t’u parë nëse incidenti do të ndikojë te Argjentina përpara finales së Kupës së Botës kundër Spanjës.
