Gazetari Besian Beha ka ngritur pikëpyetje lidhur me përbërjen e paneleve gjyqësore që kanë vendosur për vazhdimin e paraburgimit të ish-krerëve të Ushtrisë Çlirimtare të Kosovës në Hagë.
I ftuar në emisionin “Paradoks” me Vehbi Kajtazin, Beha ka veçuar rastin e gjyqtarit gjerman Kai Ambos, i cili, sipas tij, kishte dhënë një opinion të ndarë në një prej vendimeve për kërkesën e mbrojtjes për lirimin e Hashim Thaçit.
Beha tregoi se Ambos kishte vlerësuar se, nëse shtetet e treta do të ofronin garanci të mjaftueshme për të siguruar mbrojtjen e të akuzuarit në liri ose në arrest shtëpiak, atëherë duhej të shqyrtohej mundësia e lirimit të tij, veçanërisht duke pasur parasysh kohëzgjatjen e procesit.
“Thotë që, nëse kemi garanci prej shteteve të treta që mund ta sigurojnë mbrojtjen në liri, arrestin shtëpiak, duhet të shqyrtohet mundësia me liru, se procesi po duket që do të zgjasë”, tha Beha.
Por, sipas gazetarit, pas këtij opinioni, Ambos nuk ishte përfshirë për rreth një vit në panelet që shqyrtonin kërkesat për lirimin ose vazhdimin e paraburgimit të ish-krerëve të UÇK-së.
Beha ngriti dilemen nëse bëhej fjalë për një ndryshim rutinor në përbërjen e paneleve apo nëse mos-përfshirja e Ambos kishte lidhje me opinionin e tij në rastin e Thaçit.
“Gjyqtari Kai Ambos asnjëherë për një vit nuk është vendosur më në panelet që vendosin për lirimin ose jo për krerët e UÇK-së”, deklaroi Beha.
Ai tha se kjo çështje, sipas tij, është bërë edhe më interesante pas një opinioni tjetër të ndarë të Ambos në rastin e Hysni Gucatit dhe Nasim Haradinajt, ku gjyqtari kishte shprehur mospajtim me disa pjesë të aktgjykimit.
Beha e konsideroi si pikëpyetje faktin që pikërisht gjyqtari që kishte lënë të hapur mundësinë e lirimit të të akuzuarve nga paraburgimi, më pas nuk ishte përfshirë në panelet që shqyrtonin çështjen e lirimit të tyre.
