Në një prononcim për Gazeta Blic, Burjani tha se LDK-ja nuk duhet të sillet si “karrocë e thyer” në skenën politike dhe nuk duhet të marrë rol mbështetës ndaj një qeverie të udhëhequr nga LVV-ja.

Ai ka kritikuar edhe takimin mes Lumir Abdixhikut dhe Albin Kurtit, duke thënë se Abdixhiku nuk është dashur të bëjë marrëveshje personale me LVV-në, por një marrëveshje në nivel partiak.

“Gjashtë deputetë të LDK-së po e mbrojnë LDK-në që të mos mbetet organizatë bamirësie apo OJQ, që kujdeset më shumë për qytetarët sesa për veten e vet, duke e mirëmbajtur pushtetin qeverisës të LVV-së. Kjo nuk është politikë e LDK-së. LDK nuk duhet të sillet si karrocë e thyer në politikën aktuale që po mbretëron”, është shprehur Burjani

Ai ka thënë se, nëse LVV-ja vazhdon ta mbajë peng konstituimin e Kuvendit për interesa politike, kjo situatë ka kaluar çdo masë.

“Një Lëvizje si VV mban peng një shtet për interes të vetin, ose pushtetin, ose nuk e thërret seancën konstituive të Kuvendit. Kjo është tepruar”, ka deklaruar ai.

Sipas Burjanit, marrëveshja eventuale mes LDK-së dhe LVV-së duhet të jetë e qartë dhe partiake, duke propozuar një koalicion klasik ku LDK-ja do të kishte postin e presidentit dhe gjashtë ministri.

“Nuk është dashur që Abdixhiku të bëj marrëveshje personale, por partiake me LVV-në, presidenti duhet t’i takoj LDK-së dhe këtu e kanë qitë pikën gjashtë deputetët e LDK-së, nuk ka marrëveshje Kurti-Abdixhiku në mes tyre, por përformancë artistike, me një njeri që e kanë thirrë me qëndru statist, me një fjalim të shkurtër të Lumirit”, tha ai.

Ai gjithashtu pretendon se qëndrimi i Abdixhikut nuk gëzon mbështetjen e shumicës së Grupit Parlamentar të LDK-së.

“Ky model është rrëzuar nga Grupi Parlamentar, shumica e tyre nuk e përkrahin. Pra, nuk duhet të humbet kohë me këtë temë, por duhet ose koalicion klasik mes LDK-së dhe VV-së, ku presidenti dhe gjashtë ministri i takojnë LDK-së, ose duhet të shkohet në zgjedhje të jashtëzakonshme”, ka përfunduar Burjani.