Meçi i shumëpritur mes Tyson Furyt dhe Anthony Joshuas, i planifikuar për 11 dhjetor në stadiumin “Principality” të Cardiffit, është vënë sërish në dyshim për shkak të një përplasjeje mes promotorëve.
Përballja mes dy britanikëve ishte zyrtarizuar në fillim të kësaj jave, pas vitesh negociatash të dështuara. Meçi do të transmetohet në Netflix dhe është konfirmuar si bashkëpunim mes “The Ring”, të drejtuar nga Turki Alalshikh, dhe presidentit të UFC-së, Dana White.
Megjithatë, pikërisht përfshirja e White duket se është kthyer në pengesë për realizimin e përballjes.
Eddie Hearn, promotori i Joshuas, ka qenë në përplasje publike me White gjatë muajve të fundit dhe ka thënë se përfshirja e shefit të UFC-së në organizimin e meçit është në kundërshtim me kontratën e tyre.
Ndërkohë, Fury ka akuzuar Joshuan dhe Hearnin se po përpiqen të tërhiqen nga përballja.
“Anthony Joshua dhe Eddie Hearn po përpiqen të tërhiqen nga ky meç. Ata po thonë se nuk do të luftojnë më”, ka shkruar Fury në Instagram.
Sipas Furyt, problemi kryesor lidhet me qëndrimin e Hearnit ndaj Dana White.
“Kryesisht ka të bëjë me egon e Eddie Hearnit. Ai po shpik një milion gjëra të ndryshme dhe po kërcënon se nuk do të luftojmë”, ka deklaruar Fury.
Fury ka shtuar se Turki Alalshikh tashmë po kërkon alternativa për realizimin e meçit.
“Eddie Hearn na e ka rrezikuar meçin më të madh në historinë e boksit”, ka shkruar Fury.
