Erik ten Hag ka kritikuar Cristiano Ronaldon për angazhimin e tij gjatë periudhës kur të dy ishin pjesë e Manchester Unitedit.
Në një intervistë për The Athletic, ish-trajneri i “Djajve të Kuq” tha se ishte zhgënjyer nga sulmuesi portugez, pasi klubi kishte planifikuar të mbështetej tek ai.
“E la ekipin në baltë dhe më zhgënjeu, sepse kishim planifikuar me të”, deklaroi Ten Hag.
Holandezi pretendoi se Ronaldo nuk i përmbushte kërkesat taktike, veçanërisht sa i përket lëvizjeve në zonën e rreptësisë dhe presingut ndaj kundërshtarëve.
“Ai nuk vraponte as kur kishim topin, as kur nuk e kishim. Arsyeja ishte se nuk ishte përgatitur siç duhej”, u shpreh Ten Hag.
Ai theksoi se, pavarësisht rëndësisë së yjeve në skuadrat e mëdha, edhe lojtarët më të mirë duhet të punojnë për ekipin.
“Çdo skuadër e madhe duhet ta pranojë lojtarin e saj më të mirë, por lojtari më i mirë duhet të punojë për ekipin. Për disa, Manchester Unitedi nuk ishte prioriteti kryesor”, shtoi ai.
Marrëdhënia mes Ronaldos dhe Ten Hag u tensionua gjatë vitit 2022, kur portugezi refuzoi të hynte si zëvendësues në ndeshjen ndaj Tottenhamit dhe më pas kritikoi publikisht klubin në një intervistë.
Në nëntor të atij viti, Ronaldo dhe Manchester Unitedi e ndërprenë kontratën me marrëveshje të përbashkët. Më pas, sulmuesi iu bashkua klubit saudit Al-Nassr.
