Ndarja nga jeta e artistes Rinesa Qeriqi, pas një beteje me një sëmundje të rëndë, ka prekur thellë komunitetin artistik dhe publikun.
Lajmi për ikjen e saj të parakohshme ka nxitur reagime të shumta, mes të cilave edhe atë të Taynas, me të cilën Rinesa kishte bashkëpunuar në këngën “Nata”, pjesë e albumit “Genesis”.
Përmes disa postimeve prekëse në rrjetet sociale, Tayna ka shprehur dhimbjen dhe tronditjen e saj për humbjen e Rinesës. Ajo tregoi se e njihte prej kohësh si artiste dhe se talenti, realizmi dhe thellësia e krijimtarisë së saj i kishin bërë gjithmonë përshtypje. Kur kishte vendosur të bashkëpunonte me artistë të rinj, Rinesa kishte qenë ndër emrat e parë që i kishin ardhur në mendje.
Në shkrimin e saj, Tayna kujtoi edhe momentin kur Rinesa i kishte dërguar disa prej këngëve të saj për të zgjedhur. Reperja tregoi se ishte mahnitur nga muzika e saj dhe se e kishte vlerësuar shumë sinqeritetin dhe përkushtimin e saj artistik.
Ajo e përshkroi Rinesën si një artiste vizionare, shumë përpara kohës së saj për nga shkrimi, mendimi dhe muzika, duke e cilësuar si “një botë më vete”.
Tayna zbuloi se gjatë ditëve të fundit e kishte pasur shpesh në mendje Rinesën dhe ishte shqetësuar për gjendjen e saj shëndetësore. Megjithatë, lajmi për ndarjen e saj nga jeta i kishte ardhur si një tronditje e madhe, të cilën ende e kishte të vështirë ta përballonte.
