Pas mbylljes së vendvotimeve në zgjedhjet parlamentare në Serbi, presidenti Aleksandar Vuçiq ka deklaruar se partia e tij do ta pranojë rezultatin, pavarësisht nëse fiton apo humbet.
Pas votimit në Beogradin e Ri, ku ishte i shoqëruar nga bashkëshortja Tamara Vuçiq, ai tha se pret që procesi zgjedhor të përfundojë në qetësi dhe që rezultati të pasqyrojë vullnetin e qytetarëve.
“Ne gjithmonë do të sillemi me përgjegjësi. Nëse humbasim, do ta njohim vullnetin e votuesve, ndërsa nëse fitojmë, askush nuk do të na e marrë atë fitore”, u shpreh Vuçiq para gazetarëve.
Ai i cilësoi këto zgjedhje si vendimtare për të ardhmen e Serbisë, duke thënë se qytetarët do të përcaktojnë përmes votës drejtimin që do të marrë vendi.
Vuçiq gjithashtu shprehu pritshmëri për pjesëmarrje të lartë dhe bëri të ditur se vlerësimet e para të rezultateve mund të publikohen ndërmjet orës 22:00 dhe 23:30.
I pyetur për mundësinë e humbjes së pushtetit dhe kalimit në opozitë, presidenti serb tha se gjithçka do të varet nga rezultati zgjedhor dhe se në një rast të tillë do të duhej të zhvillonte bisedime me partitë e tjera opozitare.
Gjatë prononcimit, ai foli edhe për marrëdhëniet me Kroacinë, duke shprehur shpresën për përmirësimin e tyre, por njëkohësisht duke kritikuar mediat kroate për, siç pretendoi ai, ndërhyrje në politikën e brendshme të Serbisë.
Vuçiq u shpreh gjithashtu i kënaqur me mbështetjen që ka marrë nga presidenti rus Vladimir Putin dhe përmendi zhvillimet e ndryshme gjatë fushatës zgjedhore.
Në fund, ai deklaroi se ka kaluar shumë sfida gjatë karrierës politike dhe theksoi se, sipas tij, rezultatet e punës së qeverisë janë të dukshme përmes projekteve dhe zhvillimeve në vend.
