Pasi doli para Gjykatës Themelore në Gjilan një ditë pasi u arrestua për vrasje të rëndë në fshatin Demiraj, një familjare iu afrua 65-vjeçarit me inicialet B.D., për t’i dhënë kurajo pasi ai po largohej pas seancës i prangosur dhe nën përcjelljen e policëve.
“A je mirë?”, e pyeti ajo ndërsa burri po largohej nga gjykata, siç dëgjohet në një video të televizionit T7. “Mirë”, ia ktheu ai.
“Përnjëmend?”, e pyeti sërish ajo. “Mirë mirë”, iu përgjigj 65-vjeçari.
“Bonu i fortë”, ishte mesazhi i fundit i familjares para se policët ta fusnin në veturë.
“Po po”, ia ktheu 65-vjeçari.
Prokuroria Themelore në Gjilan ka kërkuar caktimin e masës së paraburgimit ndaj B.D., i dyshuar për vrasjen e rëndë, në rastin e djeshëm ku u gjetën të vdekur një 27-vjeçar dhe një foshnje tre muajshe në fshatin Demiraj të Gjilanit.
Rrethanat e rastit nuk janë bërë të ditura plotësisht. Policia nuk tha nëse 65-vjeçari dyshohet për vrasje të dyfishtë.
