Ish-kreu i Agjencisë për Siguri dhe Informacion (BIA) në Serbi, Aleksandar Vulin, i njohur për afërsinë e tij me Moskën dhe qëndrimet pro-ruse, ka mbërritur në kryeqytetin rus, pas incidentit me aeroplanin e Air Serbias që u kthye në Beograd gjatë fluturimit drejt Moskës.
Vulin, i cili aktualisht drejton Lëvizjen Socialiste dhe është kryetar i Bordit Mbikëqyrës të kompanisë Srbijagas, ka reaguar nga Moska, duke mohuar se kishte tentuar të largohej nga Serbia për t’iu shmangur ndonjë kontrolli apo hetimi.
Ai ka akuzuar autoritetet serbe për presion politik dhe përhapje të, siç i quajti, gënjeshtrave lidhur me udhëtimin e tij.
“Pas një nate të tërë të keqtrajtimit nga pushteti i ri, ja ku jam, megjithatë në Moskë. Kjo ishte një natë gënjeshtrash dhe dhune, gjatë së cilës pretendonin se në një çantë të vogël shpine kisha transportuar miliona euro dhe dhjetëra kilogramë ar”, deklaroi Vulin.
Ai pretendoi se qindra pasagjerë në aeroplan ishin keqtrajtuar për shkak të interesave politike.
Duke mohuar se kishte ikur nga Serbia, Vulin tha se nuk mund të largohej nga vendi pa fëmijët e tij.
“Unë nuk kam shkuar askund, nuk kam ikur askund. Ata që publikojnë këto pretendime në Twitter ndoshta nuk kanë familje, sepse po të kishin fëmijë, do ta dinin se njeriu nuk mund të largohet pa fëmijët e tij. Mund të shkosh në një ndeshje, por nuk mund të jetosh pa djemtë e tu. Ashtu siç nuk mund të jetosh pa Serbinë”, tha ai.
Rasti lidhet me fluturimin JU134 të Air Serbias, i cili të martën në mbrëmje ishte nisur nga aeroporti “Nikola Tesla” në Beograd drejt Moskës, por u detyrua të kthehej në kryeqytetin serb, pasi kishte hyrë në hapësirën ajrore evropiane, pranë kufirit mes Lituanisë dhe Bjellorusisë.
Sipas raportimeve të mediave serbe, kthimi i aeroplanit lidhet me dyshimet për shkelje të procedurave të sigurisë në aeroportin e Beogradit.
Prokuroria e Tretë Themelore Publike ka konfirmuar se do të kryejë verifikime shtesë për këtë rast.
Sipas njoftimit të saj, policia kishte informuar prokurorin kujdestar se vendimi për kthimin e aeroplanit ishte marrë pas shqyrtimit të pamjeve të kamerave të sigurisë.
Në to dyshohet se shihej njëri prej udhëtarëve duke kaluar kontrollin e sigurisë i shoqëruar nga një zyrtar i BIA-s, pa iu nënshtruar kontrollit të zakonshëm. Për më tepër, gjatë kalimit të tij ishte aktivizuar alarmi i sigurisë, por nuk ishte kryer kontroll i mëtejshëm.
Portali “Nova.rs” raportoi se bëhej fjalë pikërisht për Aleksandar Vulin. Në aeroplan ndodheshin edhe drejtori i Srbijagasit, Dušan Bajatović, dhe kryetari i Partisë Popullore Serbe, Nenad Popović.
Prokuroria pritet të sqarojë rrethanat e plota të incidentit dhe pretendimet për shmangien e procedurave të kontrollit të sigurisë.
