Kryeredaktori i portalit serb “Nova” Ratko Femiq tha se pas takimit të djeshëm mes Gabriel Escobarit, Miroslav Lajçakut dhe Aleksandar Vuçiqit, si dhe pas daljes në media të Escobarit, ai mund të konkludojë se “pa marrë parasysh sa i ngremë kokat tona dhe protestojmë diçka – megjithatë ne jemi këtu bashkëpunues dhe se barrikadat në veri të Kosovës do të hiqen”.
Ai në një emision në N1 theksoi se heqja e barrikadave ndoshta do të jetë treguesi i parë i rezultateve të takimit dhe pret që nuk do të kalojë shumë kohë që kjo të ndodhë, transmeton Klankosova.tv.
Lidhur me kërkesën për kthimin e ushtrisë serbe në Kosovë, për të cilën Qeveria serbe duhet të vendosë sot, Femiqi thotë se tashmë e dimë rezultatin, por Vuçiqi duhet të bëjë diçka në këtë situatë si president.
Ai gjithashtu kujton se katër vjet më parë Vuçiqi tha të kundërtën dhe shpjegoi “pse ne nuk mund ta bëjmë atë, dhe se kjo që ai po bën tani është më shumë për përdorim të brendshëm dhe një mesazh për votuesit e tij duke u thënë atyre se ai po lufton dhe nuk heq dorë”.
“Megjithatë, ajo që të gjithë e dimë është se nuk ka asnjë qëllim”, shton ai.
Femiq gjithashtu thekson se nuk janë të vërteta pretendimet e mediave pro regjimit se Vuçiqi ishte personi i parë nga ai vend që kërkoi kthimin e forcave serbe të sigurisë në Kosovë dhe se të njëjtën gjë e kishte kërkuar edhe ish-kryeministri serb, Zoran Xhinxhiq, shumë kohë më parë, por nga Këshilli i Sigurimit i OKB-së, i cili është i vetmi me mandat për një gjë të tillë.
Lidhur me Vuçiqin, ai thotë se mendon se “nuk e ka ndryshuar qëndrimin e shprehur katër vite më parë, se edhe ai është i vetëdijshëm se nuk do të ndodhë ajo që po kërkojmë, por se në atë situatë, ku ai është i pafuqishëm të bëjë diçka tjetër, veprimi duhet të promovohet, se ‘a po e shihni, ne do të kërkojmë që 1000 pjesëtarë tanë të kthehen në Kosovë’”.
“Rezultati do të jetë i njëjti – nuk do të ndodhë asgjë”, theksoi ai.
Lidhur me propozimin e ri të Gjermanisë dhe Francës për Kosovën, Femiq thekson se pas tij janë edhe vendet e BE-së që nuk e kanë njohur Kosovën dhe se për këtë ka kontribuar e gjithë historia në Ukrainë, sepse edhe vendet që nuk e njohin Kosovën kanë mundësi të shikoni çfarë mund të bëjë ndikimi rus, prandaj kudo që ka ndikim rus, ata përpiqen të qetësojnë situatën”.
“Nuk do të thotë domosdoshmërisht se ato vende, nëse pranohet propozimi franko-gjerman, do ta njohin pavarësinë e Kosovës për shkak të problemeve të tjera që kanë me rajonet që duan pavarësinë, por në këtë moment, ndoshta janë të mendimit se topi duhet lëshuar, se duhet të bisedohet dhe palët duhet të afrohen”.
Mirëpo, siç shton ai, “edhe nëse ajo marrëveshje pranohet, nuk do të jetë as marrëveshje përfundimtare dhe se marrëveshja do të nënshkruhet për hir të marrëveshjes”.
“Diçka do të nënshkruhet”, shtoi ai.
Kryeredaktori i “Nova” gjithashtu thekson se ka një arsye objektive për përshpejtimin e marrëveshjes sepse vendet e BE-së i frikësohen forcimit të ndikimit rus në rajon dhe duan të vënë nën kontroll konfliktin e ngrirë.
“Nga kjo perspektivë, është pak e vështirë për mua të imagjinoj se mund të nënshkruhet një marrëveshje gjatë vitit të ardhshëm që do t’i japë fund gjithë kësaj historie, se do të formohet AKS-ja. Ne nuk kemi asnjë garanci që, edhe nëse nënshkruhet ndonjë marrëveshje, do të realizohet. Edhe marrëveshja e Brukselit është nënshkruar, AKS-ja ka qenë pjesë e marrëveshjes së Brukselit, por që nuk është zbatuar asnjëherë”, deklaroi Femiq.
Sipas tij, as nga kryeministri Albin Kurti nuk pret vullnet e as konstruktivitet se do të formojë Asociacionin e Komunave me Shumicë Serbe.
Në lidhje me vendimin e serbëve për largim nga institucionet e Kosovës, dhe zëvendësimin e tyre me të tjerë, sidomos në asambletë komunale të komunave veriore, ai thotë se Lista Serbe nuk e ka menduar se do të ndodhë kjo. Por thotë se Kurti e shfrytëzoi situatën.
Lidhur me vendimin e Kosovës për të aplikuar sot për kandidaturë në BE, Femiqi thotë se ky është një mesazh për opinionin e tyre, BE-në, por edhe për ne këtu.
“Mendoj se Kurti e ka shfrytëzuar mirë hapësirën e zbrazët të krijuar nga tërheqja e serbëve nga institucionet dhe e ka kontrolluar lojtarin nga ana tjetër”, ka thënë Femiqi.
Ai shton se Kurti po tenton të imponohet si lider që pranon vlerat evropiane, por mendon se kjo nuk do të mjaftojë, pasi thotë se Kurti kontribuon në përshkallëzimin. “Unë nuk shoh vlera evropiane në veprimet dhe paraqitjet e tij”, thotë ai.
“Kurti është kundër AKS-së dhe do të shohim se sa presion do të bëjë SHBA-ja që të pajtohet me AKS-në, e sa i përket BE-së – Gjermanisë dhe Francës, nuk besoj se realisht kanë fuqi të bëjnë presion ndaj Kurtit”, shtoi kryeredaktori i portalit serb “Nova”, Ratko Femiq. /Klankosova.tv
