Kushtet e punës dhe mos siguria në punë, sidomos në sektorin e ndërtimtarisë shpeshherë del të jetë fatale për punëtorët e këtij sektori. Vetëm gjatë vitit 2022 në Kosovë, 15 persona në sektorin e ndërtimtarisë kanë humbur jetën në vendin e punës.
E, për këtë ndërtimtaria në Kosovë konsiderohet me rrezikshmëri të lartë, pasi që shumë nga kompanitë ndërtuese nuk i obligojnë punëtorët që gjatë kohës së punës të pajisen me masat mbrojtëse dhe po ashtu nuk ofrojnë siguri të mjaftueshme për ta në vend-punishte.
Para ditësh ka filluar gërmimin për një objekt banesor kompania ndërtimore nga Mitrovica “Afri Univerzal”, por që lokacioni nga institucionet e sigurisë është vlerësuar i papërshtatshëm, pasi që gjendet pranë objekteve të stacionit policor dhe një objekt të sigurisë shtetërore, puna e të cilit është mjaftë e ndjeshme.
Pavarësisht reagimeve në forma zyrtare dhe mos dhënies së lejes ndërtimore në fazën fillestare nga Drejtoria e Urbanizmit e Mitrovicës, kompania “Afri Univerzial” kishte arritur që lejen ndërtuese ta marrë pas kërkesës/ankesës në Ministrinë e Ambientit.
Sikur të mos mjaftonte me kaq. Veriu.info mëson se banorët që i kanë shtëpitë afër objektit ku e ka nisur “Afri Univerzal”, kanë bërë ankesë në komunë dhe institucione tjera relevante, me arsyen se kompania “Afri Univerzal” me punimet e pasigurta në vendpunishten e tyre po i rrezikon ata.
Pas këtyre ankesave në vendpiunishte ka dalë Inspektorati i Punës, i cili ka konstatuar se kompania “Afri Univerzal” nuk i ka marrë masat adekuate për siguri në punë, duke mos bërë sigurimin e zonës përreth objektit dhe rrjedhimisht duke rrezikuar sigurinë e qytetarëve që jetojnë pranë, por edhe duke rrezikuar punëtorët e institucioneve të sigurisë.
Veriu.info ka siguruar pamje nga vendpunishtja, ku shihet se Inspektorati i Punës i ka bllokuar punimet dhe i ka vendosur shiritat për mos hyrje ne vendpunishte.
Burime të Veriu.info bëjnë të ditur se banorët përreth janë ankuar në komunën e Mitrovicës, se kompania “Afri Univerzal” nuk ka vendosur ‘pilota’ në gjithë themelin e objektit, dhe sipas tyre kjo mund të ketë për pasojë shembjen e dheut dhe rrezikimin e sigurisë së tyre.
Veriu.info ka tentuar të kontaktoj kompaninë “Afri Univerzal” për të marrë një prononcim, por deri më tash kontakti ka qenë i pamundur.
