Në maj të vitit 2019 ish kryetari i Vushtrrisë, Xhafer Tahiri, kishte mbajtur një konferencë ekonomike të diasporës, ku kishte shpalosur mundësitë për investime në Vushtrri, me ç’rast aty kishte prezantuar Parkun e Biznesit në fshati Lum i Madh, duke e cilësuar si projektin më madhor i qeverisjes së tij.
Mirëpo, tash komuna e Vushtrrisë që udhëhiqet nga kryetari Ferit Idrizi është në hall të madh me këtë park të biznesit, i cili në qeverisjen e kaluar ishte parë si promotor i hapjes së vendeve të reja në Vushrri.
Veriu.info ka siguruar shkresën zyrtare që Agjencia Kundër Korrupsionit i ka dërguar komunës së Vushtrrisë më datë 25.03.2022, përmes së cilës konstatohet se ka pasur konflikt interesi me rastin nga dy asambleistë të Kuvendit Komunal të Vushtrrisë në seancën e jashtëzakonshme të mbajtur 16.04.2021 për dhënien në shfrytëzim afatgjatë me kompensim të pronës së paluajtshme të komunës në parkun industrial në fshatin Lum madh, raporton Veriu.info
Përmes këtij opinioni të cilin e ka siguruar Veriu.info, Agjencia Kundër Korrupsionit i ka kërkuar Kryesueses së Kuvendit Komunal të Vushtrrisë, inicimin e procedurës për rishqyrtimin e vendimit nr.81/21 për dhënien në shfrytëzim afatgjatë me kompensim të pronës së paluajtshme në Lum të madh.
Po ashtu AKK në shkresë ka cituar edhe nenin 23 pika 1.13 të Ligjit për parandalimin e konfliktit të interesit ku shprehimisht thuhet se: “Agjencia i kërkon rishqyrtimin, revokimin dhe/ose shfruqizimin e aktit të nxjerrë në konflikt të interesit organit që e ka nxjerrë atë. Që nga momenti kur Agjencia kërkon rishqyrtimin e vendimit, çdo veprim për zbatimin e tij pezullohet deri në momentin kur organi vendos për vlefshmërinë e vendimit.
AKK ka paralajmëruar komunën e Vushtrrisë së duhet të njoftohet për vendimin e ndërmarrë për zbatimin e këtij opinioni, raporton Veriu.info
Veriu.info kishte raportuar në janar të vitit 2022 se Njësia e Krimeve Ekonomike e Policisë së Kosovës po heton kontratat e dhënies në shfrytëzim të pronave komunale në Zonën Ekonomike në Lumadh, për shkak të dyshimit të keqpërdorimit nga bizneset dhe zyrtarët komunal me kontratat e këtyre pronave. (Lexo këtu shkrimin e plotë: Krimet Ekonomike ‘trokasin’ në dyert e komunës, po hetojnë për keqpërdorime kontratat e dhënies së pronave komunale nga qeverisja e Xhafer Tahirit)
