Përfundimi i zgjedhjeve lokale përcjellet me certifikim të rezultateve dhe më pas me dorëzim-pranim të detyrës nga kryetarët e zgjedhur para katër vitesh te kryetarët e rinj, aty ku ka ndrrim të pushtetit. Sikurse edhe në të kaluarën, ky ‘tranzicion’ i pushtetit komunal përcjellet edhe me allishverishe, pasi që qeverisjet komunale në shkuarje i kryejnë disa punë, qoftë edhe joligjore, të cilat nuk kanë mundur t’i kryejnë në vitin e fundit qeverisës për shkak të efektit që mund të kishin në humbjen e votave në zgjedhje. Një rast i tillë po ndodh edhe në Mitrovicë në kohën kur Bedri Hamza është në muajin e fundit të dorëzimit të pushtetit te kryetari i ardhshëm, Faton Peci.
Burime të Veriu.info bëjnë të ditur se qeverisja komunale e Mitrovicës që drejtohet nga kryetari në shkuarje, Bedri Hamza përmes Drejtorisë së Urbanimizmit që udhëheqet nga drejtori Edison Tërnava është në fazën finale të lëshimit të lejes për një mbindërtim të ndërtuar në kundërshtim të plotë me lejen ndërtimore nga kompania “Medi Premium”.
Siç mëson Veriu.info, ky do të jetë rasti i parë në qeverisjen Hamza që një kompanie ndërtimore i bëhet revidimi i lejes ndërtimore, me qëllim të legalizimit të një mbindërtimi pa leje.
Veriu.info nga burime brenda PDK-së në Mitrovicë, ka marrë informacione që arsyeja pse po i legalizohet mbindërtimi pa leje, në vend se ti rrënohet, është mbështetja që pronari i “Medi Premium” dhe rrethi i tij i kishin dhënë PDK-së në garën për kryetar komune më 12 tetor dhe në balotazh më 9 nëntor.
Pas raportimit ekskluziv nga Veriu.info, në muajin qershor inspektorët e ndërtimit të Drejtorisë së Inspeksionit në Komunën e Mitrovicës i kishin ndërprerë punimet kompanisë “Medi Premium” për mbindërtimin e një “Penthouse” pa leje në qendër të Mitrovicës.
Në procesverbalin e ndërprerjes së mbindërtimit, inspektorët kishin paralajmëruar kompaninë që nëse nuk pajiset me leje brenda 30 ditësh, tejkalimi i ndërtimit do të rrënohet. Ky porcesverbal ishte nxjerrë më 11 qershor dhe rrënimi nuk ndodhi pas 30 ditësh.
Në korrik Veriu.info kishte raportuar për thellim të skandalit, pasi që kompania kishte ndërtuar edhe një “Penthouse” pa leje si mbindërtim në objektin ngjitur “Penthouse” paraprak, por që prapë komuna e drejtuar nga Bedri Hamza kishte mbyllur sytë dhe nuk kishte bërë rrënimin.
Redaksia e Veriu.info më 3 tetor ka dërguar pyetje zyres për informim të Komunës së Mitrovicës dhe inspektorit të lëndës, duke i pyetur se a është nxjerëë aktvendimin për rrënimin e mbindërtimt dhe pse po neglizhohet kjo çështje, por që nuk kemi marrë përgjigje.
Të gjendur përballë kësaj situate, Veriu.info ka bërë denoncim në Prokurorinë Themelore të Mitrovicës për këto mbindërtime pa leje. Edhe pse nuk kemi marrë informacion zyrtar, Veriu.info mëson se prokuroria është duke e trajtuar këtë shkelje ligjore nga ana e qeverisjes komunale të Mitrovicës.
Më 13 nëntor 2025 (para dy ditësh) Veriu.info ka bërë kërkesë për qasje në dokumente publike në Komunën e Mitrovicës në dokumentet e Drejtorisë së Urbanizmit dhe Drejtorisë së Inspeksionit për të gjitha shkresat e lëndës që lidhen me mbindërtimin pa leje të “Medi Premium”, të cilat sapo t’i pranojmë do të publikohen.
