Veriu.info kishte raportuar muajin e kaluar se si kompania ndërtimore “Medi Premium” po ndërton “Penthouse” pa leje në qendër të Mitrovicës, ku më pas inspektorati komunal i ndërtimit e kishte gjobitur më gjobë simbolike prej 500 euro.
“Medi Premium” po ndërton “Penthouse” pa leje midis Mitrovicës, inspeksioni hesht (Foto/Dokument)
Me aktvendimin e inspektorit të ndërtimit, Vehbi Ahmeti, kompania “Medi Premium” ishte urdhëruar t’i ndërpres punimet, nën paralajmërimin se nëse nuk vepron sipas urdhërit do të nxjerrej aktvendimin për rrënimin e këtij mbindërtimi pa leje.
Po ashtu në këtë aktvendim thuhej se kompania ka afat 30 ditor për t’u pajisur me leje, në të kundërtën duhet ta rrënoj mbindërtimin.
Përtej këtyre dokumenteve zyrtare që tregohet se ‘me letra’ po zbatohej ligji, gjendja në terren flet ndryshe.
Kjo pasi që kompania “Medi Premium” as pas 30 dite nuk është pajisur me leje. Mirëpo, shkeljet nuk përfundojnë këtu, pasi që kjo kompani me pronar Albert Halilaj gjatë kësaj jave ka ndërtuar edhe një ‘Penthouse” pa leje ndërtimore (mbindërtim) në një objekt ngjitur objektit ku e kishte ndërtuar ‘Penthous-in’ në qershor.
Gazetarja e Veriu.info sot ka tentuar të kontaktoj me inspektorin e ndërtimin, Vehbi Ahmeti, për të marrë përgjigje se në cilën fazë është procesi i trajtimit të këtij mbindërtimi, pasi që afati 30 ditor për t’u pajisur me leje kompanisë “Medi Premium” i ka skaduar më 13 korrik, para pesë (5) ditësh, por ai ka zgjedhur arrogancën në vend të përgjigjes, ani pse është zyrtar publik dhe paguhet nga taksat e qytetarëve.
Kur gazetarja e pyet për aktvendimin e datës 13 qershor, inspektori i ndërtimit thotë: “Mas pari gabim e ki datën edhe mos më shqetëso se jam t’u hangër bukë në pauzë.”
Dokumenti zyrtar i nxjerrë nga ai, të cilin Veriu.info e ka siguruar përmes qasjes publike, e nxjerrë në rrenë inspektorin Vehbi Ahmeti, i cili mundohet ta kamufloj rastin. Përveç kësaj të pavërtete të thënë nga ai, këtu ai tregon se është në pauzë, e cila në institucione publike është nga ora 12:00 deri 13:00, përderisa gazetarja e ka kontaktuar në ora 13:10. Inspektori Ahmeti ose gënjen edhe këtu sikurse për datën e aktvendimit, ose ka dalë në pauzë gjatë orarit të punës.
Pas raportimeve për ndërtim pa leje, ndërprerjes së punimeve dhe shqiptimit të gjobës, Veriu.info kishte kërkuar përgjigje në pyetjet se pas nxjerrjes së aktvendimit për ndërprerje të punimeve, a po kontrollohet subjekti afarist “Medi Premium” nëse po i vazhdon punimet, ku nga inspektori i ndërtimit me 19 qershor kemi marrë këtë përgjigje: “Menjëherë pas nxjerrjes së aktvendimit, inspektorët kompetentë të ndërtimit kanë realizuar inspektime në terren me qëllim të verifikimit të gjendjes faktike dhe respektimit të urdhrave të përcaktuara në aktvendim. Janë ndërmarrë masa të menjëhershme për ndalimin e punimeve në mbindërtim, dhe subjekti është njoftuar për pasojat ligjore në rast të mosrespektimit të vendimit. Inspektimi i parë është realizuar brenda pak ditësh pas lëshimit të aktvendimit. Gjatë inspektimit është konstatuar se subjekti kishte ndalur një pjesë të punimeve, megjithatë janë identifikuar disa veprime që lënë të kuptohet se punimet mund të jenë vazhduar në mënyrë jo të deklaruar. Si rezultat, janë lëshuar vërejtje shtesë dhe është kërkuar respektimi i plotë i ndalimit deri në pajisjen me dokumentacionin përkatës. Inspektimet janë duke u zhvilluar në vazhdimësi, dhe për periudhën e afatit të dhënë 30-ditor janë planifikuar kontrolle të përsëritura për të siguruar që nuk ka veprime ndërtimore të jashtëligjshme. Çdo devijim do të trajtohet sipas procedurave ligjore përkatëse. Drejtoria e Inspeksionit, përkatësisht Sektori i Ndërtimit, është i vetëdijshme për përgjegjësitë që i takojnë dhe është duke ndërmarrë të gjitha masat e nevojshme për të parandaluar çdo aktivitet ndërtimor që bie në kundërshtim me ligjin. Inspektimet po kryhen në mënyrë të rregullt dhe të dokumentuar. Në rast të ndonjë shkeljeje të re, do të ndërmerren masat e parapara me legjislacionin në fuqi, përfshirë edhe nxjerrjen e aktvendimit për rrënim, nëse subjekti nuk i përmbahet vendimit ekzistues”, thuhej në përgjigjen e inspektorit Vehbi Ahmeti.
Pra, në përgjigjen e inspektorit Ahmeti thuhet se subjekti ka bërë punime të padeklaruara, me ç’rast i është lëshuar vërejtje shtesë, ani pse me vendimin e datës 13 qershor ndalohej rreptësisht çdo punim në mbindërtim.
Veriu.info më 19 qershor përmes kërkesës për qasje në dokumente publike, kishte kërkuar qasje në vërejtjen e dhënë nga inspeksioni për kompaninë “Medi Premium” që kishte të bënte me vazhdimin e punimeve të padeklaruara, por që e njëjta na u ka dhënë vetëm më 9 korrik, ani pse afati ligjor është shtatë ditë prej bërjes së kërkesës.
Edhe pse në përgjigjen e inspektorit Ahmeti thuhej se i ishte dhënë vërejtje kompanisë “Medi Premium” për punime të padeklarura, në shkresën që ai e ka ofruar përmes qasjes në dokumente publike, shihet se ajo nuk është vërejtje, por procesverbal në të cilin në asnjë pikë nuk konstatohen punime e padeklaruara. Pra, edhe në gënjeshtër e radhës nga ky zyrtar publik që detyrë e ka mbikëqyrjen e ndërtimeve në qytetin e Mitrovicës.
“Inspeksioni i ndërtimit ka bërë inspektimin dhe ka konstuar: Poseduesi i lejes ndërtimore duhet ta respektoj aktvendimin … e datës 13.06.2025 oër ndërprerjen e punimeve në pjesën e ndërtimit që përbën tejkalim dhe është në kundërshtim me lejen e ndërtimit. Në pjesët e tjera mund të punoj sipas lejes ndërtimore”, thuhet ne procesverbalin e inpektorëve të ndërtimit të nxjerrë më datë 18.06.2025.
Më 14 korrik, tridhjetë (30) ditë pas aktvendimit për ndërprerje të punimeve, Veriu.info ka dërguar pyetje në zyren për informim të Komunës së Mitrovicës për të kuptuar se a është pajisur “Medi Premium” me leje për ‘Penthouse’ dhe se a është nxjerrë vendim për rrënim nëse nuk është pajisur me leje, por që akoma nuk kemi marrë një përgjigje.
Burime të sigurta të Veriu.info bëjnë të ditur se kjo kompani nuk është pajisur me këtë leje, as 30 ditë pas afatit të dhënë nga inspektori i ndërtimit, i cili me dokument zyrtar kishte vendosur që nëse kompania nuk pajiset me leje brenda këtij afati do të bëhet rrënimi i ‘Penthouse’ të ndërtuar pa leje si mbindërtim.
Në fotot e siguruara nga Veriu.info, shihet se kompania”Medi Premium” me pronar Albert Halilaj ka ndërtuar edhe ‘Penthouse’ të ri gjatë kësaj jave, përveç ‘Penthous-it’ të parë të ndërtuar muajin e kaluar.
Pra, le që nuk është rrënuar mbindërtimi i parë, por inspektorët e ndërtimit të Komunës së Mitrovicës nuk kanë penguar ndërtimin edhe të një ‘Penthous-i’ tjetër pa leje ndërtimore (mbindërtim) nga kompania “Medi Premium”, para të cilët duket se janë nënshtruar inspektorët komunal të ndërtimit, për arsye që vetëm ata mund t’i dinë!
