Gjykata Themelore në Prishtinë ka dhënë detaje për shpalljen e aktgjykimit ndaj Naim Murselit, Granit Plavës e Kushtrim Kokallës.
Përmes një komunikate për media, Themelorja ka bërë të ditur se Murseli e Plava janë dënuar me burgim të përjetshëm për shkak se të njëjtit janë gjetur dhe shpallur fajtor për veprën penale Vrasje e rëndë e kryer në bashkëkryerje.
“I akuzuari N.M. është shpallë fajtor dhe është dënuar me dënim me burgim të përjetshëm për veprën penale se në bashkryerje ka kryer veprën penale Vrasje e rëndë nga neni 173 paragrafi 1 pika 1.3. dhe 1.4 lidhur me nenet 31 dhe 34 të Kodit Penal të Republikës së Kosovës.
I akuzuari G.P. është shpall fajtor dhe është dënuar me dënim me burgim të përjetshëm për veprën penale se në bashkryerje ka kryer veprën penale Vrasje e rëndë nga neni 173 paragrafi 1 pika 1.6. lidhur me nenin 31 dhe 34 të të Kodit Penal të Republikës së Kosovës dhe Mbajtja në pronësi, kontroll ose posedim të paautorizuar të armëve nga neni 366 paragrafi 1 të Kodit Penal të Republikës së Kosovës”, thuhet në komunikatën e gjykatës.
Përpos Murselit e Plavës, Themelorja ka shpallur fajtor edhe Kushtrim Kokallën. Ai është dënuar me 30 vjet burgim nga gjykata e shkallës së parë.
“I akuzuari K.K. është shpall fajtor dhe është dënuar me dënim në kohëzgjatje prej tridhjetë vitesh (30) për veprën penale Ndihmë në kryerjen e veprës penale vrasje e rëndë nga neni 173 paragrafi 1 pika 1.3 dhe 1.4 lidhur me nenin 33 të Kodit Penal të Republikës së Kosovës”, thuhet në komunikatë.
Murseli, Plava e Kokalla janë detyruar të paguajnë edhe shpenzimet e procedurës penale si dhe të paguajnë paushallin gjyqësor, secili veç e veç nga 500 euro.
Ndaj vendimit të Themelores, palët kanë të drejtë ankese në Gjykatën e Apelit në afat prej 30 ditëve.
