Kryeministri i Kosovës, Albin Kurti, i dorëzoi të enjten Çekisë – vendit që aktualisht kryeson Presidencën e Bashkimit Evropian – aplikimin e Kosovës për anëtarësim në BE. Kosova në vijim duhet të kalojë edhe nëpër tri faza kryesore: në marrjen e statusit kandidat, negociatat e anëtarësimit dhe ratifikimin e traktatit, shkruan Gazeta Sinjali.
“Kemi ardhur në Pragë për të riafirmuar zotimin e pandryshueshëm të Kosovës ndaj vlerave themelore të BE-së, lirisë, demokracisë, të drejtave të njeriut, barazisë dhe sundimit të ligjit, duke dorëzuar aplikimin për anëtarësim [në BE]”, tha Kurti.
Kjo, tha ai, është një ditë historike për Kosovën dhe një ditë e madhe për demokracinë në Evropë.
Ai tha se është i vetëdijshëm që rruga për në BE bazohet në merita të vetë shtetit dhe se nuk kërkon ndonjë “derë anësore” ose “procedurë të shpejtë” për këtë qëllim.
Ceremonia u mbajt në ndërtesën e Qeverisë çeke në Pragë, ndërsa dokumentin e aplikimit e pranoi ministri për Çështje Evropiane i Çekisë, Mikulash Bek.
Aplikimi për anëtarësim në BE është vetëm hapi i parë i një procesi që mund të zgjasë me vite.
I pyetur në lidhje me pengesën që mund të paraqesin pesë shtetet e BE-së që nuk e njohin Kosovën – Rumania, Greqia, Spanja, Sllovakia dhe Qiproja – Kurti tha se kur Kosova ka nënshkruar Marrëveshjen e Stabilizim-Asociimit me bllokun, në vitin 2015, pesë shtetet ishin dakord.
“Nuk besoj se pakica e shteteve anëtare të BE-së që ende nuk e njeh pavarësinë tonë, do të jetë kundër bashkimit tonë me familjen evropiane”, tha Kurti.
Ministri çek, Bek, tha se e mbështet Kosovën në rrugëtimin e saj drejt BE-së.
“Vlerësojmë dhe çmojmë arritjet e Kosovës deri më tani. Ne po e plotësojmë një nga prioritetet e Presidencës sonë [të BE-së], sepse në gjashtë muajt e fundit u kemi dhënë vëmendje të jashtëzakonshme çështjeve që kanë të bëjnë me Ballkanin Perëndimor”, tha Bek.
Në një konferencë për media nga Ambasada e Kosovës në Pragë, Kurti tha se synon që Kosova të arrijë anëtarësimin në BE në kohën mesatare që i është dashur shumicës së vendeve të Evropës për anëtarësim.
“Mesatarja është nëntë vjet, andaj si Republikë e Kosovës, konsiderojmë që është e arsyeshme që ta kemi parasysh këtë mesatare evropiane për anëtarësim në Bashkimin Evropian”, tha ai.
Një ditë më herët, udhëheqësit e Kosovës, përfshirë kryeministrin Kurti, presidenten Vjosa Osmani dhe kryetarin e Kuvendit, Glauk Konjufca, e nënshkruan aplikimin për anëtarësim në BE në Prishtinë, duke e cilësuar si “hap historik” për Kosovën.
Zëdhënësja e Komisionit Evropian, Ana Pisonero, tha përmes një deklarate me shkrim se Kosova ka një perspektivë të qartë evropiane dhe se BE-ja e mbështet Kosovën në rrugën e saj drejt BE-së.
“Kur bëhet fjalë për aplikimet për anëtarësim, procedurat për paraqitjen e aplikacioneve janë të përcaktuara me Traktatin e BE-së”, tha Pisonero.
Neni 49 i Traktatit të BE-së thotë se “çdo vend evropian”, i cili respekton vlerat evropiane dhe angazhohet për promovimin e tyre, mund të aplikojë për anëtarësim në BE.
Javën e ardhshme, presidenca çeke e BE-së pritet t’i njoftojë vendet tjera anëtare për aplikimin e Kosovës.
Trajtimin e kësaj çështjeje do ta vazhdojë pastaj Suedia, e cila merr kryesimin e BE-së nga 1 janari.
Nga vendet e Ballkanit Perëndimor, Kosova mbetet e fundit në procesin e integrimeve evropiane.
