Grupi Parlamentar i Partisë Demokratike të Kosovës, së bashku me asamblistë, drejtorë dhe aktivistë nga Komuna e Prishtinës, kanë vazhduar edhe sot qëndrimin para Qeverisë së Kosovës, duke i bërë thirrje deputetit Albin Kurti që të heqë dorë nga uzurpimi i Qeverisë dhe t’i kthehet rendit kushtetues, duke i hapur rrugë konstituimit të Kuvendit.
Asamblistja e Kuvendit Komunal të Prishtinës, Fjolla Vukshinaj-Reçica, ka deklaruar sot para Qeverisë së Kosovës se mosfunksionimi i Kuvendit nuk është vetëm çështje e debatit politik, por një bllokadë që, sipas saj, po prek drejtpërdrejt qytetarët, komunat dhe projektet zhvillimore.
Vukshinaj-Reçica tha se si përfaqësuese lokale dhe qytetare është aty për të ngritur zërin për njerëzit që çdo ditë presin që institucionet, si në nivelin lokal ashtu edhe në atë qendror, të funksionojnë dhe t’u japin zgjidhje problemeve të tyre.
“Bllokimi i Kuvendit të Kosovës nuk është një debat abstrakt politik. Nuk është vetëm një derë e mbyllur në këtë ndërtesë. Pas çdo dite që Kuvendi mbahet i bllokuar, është një qytetar që pret, një familje që ka një hall, një komunë që ka një projekt dhe një nevojë që mbetet pa zë”, tha ajo.
Asamblistja e Prishtinës përmendi disa shembuj të qytetarëve nga komuna të ndryshme, nga ndërmarrësit dhe fermerët, deri te studentët, punëtorët, pensionistët dhe familjet që presin shërbime më të mira nga shteti.
Ajo tha se një ndërmarrës në Ferizaj pret kushte më të mira për biznes, një fermer në Rahovec mbështetje për prodhimin, një student në Gjilan mundësi për arsim dhe punësim, ndërsa pensionistët dhe familjet në gjithë vendin përballen çdo ditë me kostot e jetesës.
“Këto janë pasojat reale të institucioneve të bllokuara. Sepse një Kuvend që nuk funksionon nuk mund t’i trajtojë siç duhet nevojat e qytetarëve, nuk mund të zhvillojë debatin për politikat dhe buxhetet që u duhen komunave dhe nuk mund t’i mbajë institucionet përgjegjëse”, deklaroi Vukshinaj-Reçica.
Sipas saj, kur Kuvendi bllokohet, nuk bllokohen vetëm deputetët, por edhe zëri i qytetarëve që i kanë zgjedhur ata.
Ajo theksoi se komunat nuk mund t’i zgjidhin të gjitha problemet të vetme dhe se bashkëpunimi me institucionet qendrore është i domosdoshëm për realizimin e projekteve të mëdha.
“Prishtina pritet të mbetet e bllokuar pa Unazën e Jashtme, ndërsa edhe komunat e tjera rrezikojnë të mbesin pa projekte të rëndësishme. Kosova nuk ka kohë për të humbur. Qytetarët nuk kanë kohë për të pritur kalkulimet politike të askujt”, tha ajo.
Vukshinaj-Reçica drejtoi kritika edhe ndaj Albin Kurtit, duke kërkuar zhbllokimin dhe konstituimin e Kuvendit.
“Albin Kurti nuk mundet, në njërën anë, t’i gëzojë privilegjet e Qeverisë, ndërsa në anën tjetër të mbahet i bllokuar konstituimi i Kuvendit. Institucionet nuk janë pronë e një individi dhe as e një partie. Ato janë të qytetarëve”, deklaroi ajo.
Në fund, asamblistja e Prishtinës i bëri thirrje Kurtit që t’i hapë rrugë funksionimit institucional.
“Z. Kurti, zhbllokojeni Kuvendin. Rikthejeni funksionimin e institucioneve. Kthejuani qytetarëve zërin që u takon. Kosova nuk mund të mbahet në pritje, ndërsa qytetarët vazhdojnë t’i paguajnë çdo ditë faturat e kësaj bllokade. Dhe për këtë, fajtor jeni vetëm ju!”, përfundoi Vukshinaj-Reçica.
Ndërkaq, deputetja Blerta Deliu-Kodra përsëriti dy thirrje për deputetin Kurti:
“Jemi përsëri këtu për t’ia kujtuar dy gjëra deputetit Kurti: E para, në këtë ndërtesë, ti dhe ministrat e tu jeni uzurpatorë. E dyta, kthejuni rendit kushtetues – ejani dhe konstituojeni Kuvendin. Ne nuk do të ndalemi. Këtu. Në Kuvend.Por për një gjë të jeni të sigurt: Kosova do të fitojë. Qytetarët do të fitojnë”, tha Deliu – Kodra.
