Të enjten, në Bruksel është zhvilluar një takim mes kryenegociatërove të Kosovës dhe Serbisë.
Ish-kryenegociatori për dialogun Kosovë-Serbi, Avni Arifi në një deklaratë të dhënë në “Front Online” ka kritikuar vendimin e Qeverisë në detyrë për të dërguar zëvendëskryeministrin në detyrë, Bisnik Bislimi në Bruksel për dialogun me Serbinë.
Arifi tha se Kosova nuk është monarki që dërgon këdo për ta përfaqësuar.
Tutje, Arifi thotë se vendi ynë nuk ka një qeveri legjitime që mund të delegojë përfaqësues të tillë.
“Nuk mundet secili qytetar i Kosovës me shkuar në Bruksel dhe me përfaqësuar Kosovën. Ne nuk jemi monarki ku mbreti e dërgon këdo me përfaqësuar shtetin. Ne nuk kemi qeveri legjitime me pas njerëz të tillë që munden me përfaqësuar Kosovën”, deklaroi Arifi për “Front Online”.
Rreth këtij takimi është deklaruar kryenegociatori, Besnik Bislimi. Ai ka thënë se ideja e takimit ka qenë që fillimisht të bëhet progres në themelimin e komisionit të përbashkët për personat e zhdukur me forcë.
‘‘Ideja sot ishte që të kemi progres në themelimin e komisionit të përbashkët për personat e zhdukur me forcë. Dhe pastaj në pjesën tjetër të kemi një takim kur Kosova dhe Serbia japin propozime konkrete sipas të cilave pastaj verzioni 10 i planit të senkuencimit do të mund të bëhej si një plan i pranueshëm për palët’’, ka thënë ai.
Bislimi ka shtuar se themelimi i këtij komisioni s’u arrit, duke thënë se ‘‘me gjasë Serbia është tërhequr nga marrëveshja për termat e referencës’’.
‘‘Në pikën e parë fatkeqësisht nuk arritëm të kryejmë misionin tonë, pra themelimin e Komisionit, për arsye se me gjasë Serbia është tërhequr nga marrëveshja për termat e referencës, duke thënë se ata duan të ndërhyjnë edhe njëherë në dokument gjë që nuk është pranuar as nga Brukseli as nga pala jonë’’, ka shtuar ai.
Tutje, Bislimi ka deklaruar edhe se Serbia, siç ka thënë ai, është tërhequr nga marrëveshja bazike ose refuzon të diskuton marrëveshjen bazike.
