Një aksion i zhvilluar nga Njësia Rajonale për Hetimin e Krimeve Ekonomike në Gjakovë ka zbuluar një rast të rëndë të qarkullimit të produkteve mjekësore të palejuara në një barnatore në fshatin Ratkoc të Rahovecit.
Burimet brenda Prokurorisë bëjnë me dije se bëhet fjalë për Jeton Berishën, rreth 47-vjeçar, pronar i barnatores “PHLLOS PHARM”, ku janë gjetur dhe sekuestruar dhjetëra artikuj të barnave pa banderola të Kosovës, e që dyshohet të jenë me origjinë nga Serbia, Shqipëria dhe Maqedonia e Veriut.
Siç mëson Sinjali, hetuesit e Krimeve Ekonomike në koordinim me Inspektoratin Farmaceutik të Ministrisë së Shëndetësisë, kanë ndërmarrë një kontroll në barnatoren “PHLLOS PHARM”, ku kanë zbuluar 73 artikuj me 227 paketime ilaçesh me origjinë nga Serbia, Shqipëria dhe Maqedonia e Veriut, të cilat nuk janë të autorizuara për tregun e Kosovës.
Sipas të dhënave të siguruara, barnat e gjetura ndodheshin në një aneks të objektit nën mbikëqyrjen e vetë pronarit. Ato janë konfiskuar nga inspektorati, ndërsa ndaj të dyshuarit është iniciuar procedurë hetimore në koordinim me Prokurorinë Themelore të Gjakovës.
Jeton Berisha është intervistuar, ndërsa me vendim të prokurorit është liruar në procedurë të rregullt, përderisa hetimet për rastin janë duke vazhduar.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
