Një incident fizik i ndodhur në Skenderaj të enjten, ku kryetari i VV-së ka pësuar lëndime fizike për të cilat e ka akuzuar kryetarin e Skenderajt, Sami Lushtaku, pritet të ketë pasoja në zingjirin komandues të Policisë së Kosovës.
Burime të Veriu.info bëjnë të ditur se në ditët e ardhshme pritet shkarkimin i Drejtorit të Policisë, Gazmend Hoxha, për shkak se nuk ka arritur të zbatoj ‘selamin’ nga politika për arrestimin e Sami Lushtakut, i cili për rreth 30 orë ka qenë i paqasshëm për intervistim nga policia me urdhëresë të prokurorisë.
“Për shkak të rastit të Skenderajt, Gazmend Hoxha do të shkarkohet javën e ardhshme. Por është edhe opsion dorëheqja e tij, e cila mund t’i paraprijë vendimit për shkarkim”, ka thënë një burim i Veriu.info nga Ministria e Punëve të Brendshme.
Pas incidentit fizik në Skenderaj, kryeministri Kurti kishte kritikuar veprimet e policisë dhe prokurorisë, duke thënë: “Me ç’mora vesh, dy veta janë arrestuar. Për përshtypjen time, reagimi edhe i Policisë edhe i Prokurorisë, ka qenë i vonuar. Nuk e di se çfarë ka ndodhur pas mesnatës por e di që reagimi është dashur të jetë shumë më i shpejtë.”
Ndryshe, sipas nenit 39 të Ligjit për Policinë, shkarkimi i drejtorit të përgjithshëm të policisë mund të bëhet nga kryeministri me rekomandim të Ministrit të Ministrisë së Punëve të Brendshme.
