Asamblisti i Lëvizjes Vetëvendosje në Komunën e Prishtinës, Berat Lahu, dhëndër i ministrit të Mjedisit, Liburn Aliut, ka përfunduar sot në prangat e Policisë së Kosovë, nën dyshimin se ka kryer veprën penale ‘Ushtrim i ndikimit’. Ai u arrestua gjatë aksionit ‘Brezovica 6’ që rezultoi me kapjen edhe të 6 të dyshuarve të tjerë, raporton Gazeta Sinjali.
Gjatë këtij aksioni, janë kontrolluar dhe bastisur 11 lokacione të ndryshme, konkretisht tetë lokacione në qytetin e Prishtinës, dy në Podujevë dhe një në Fushë Kosovë.
Por çka u gjet në shtëpinë e asamblistit Lahu në lagjen Dardania në Prishtinë?
Sipas njoftimit të fundit të Prokurorisë gjatë kontrollit te i dyshuari Berat Lahu janë gjetur dhe sekuestruar:
· Çertifikatë e pronësisë (10 fletë)
· Skicë (1 fletë) dhe
· Telefon mobil, IPHONE 11 PRO, ngjyrë hiri.
Ndryshe, Gazeta Sinjali raportoi ekskluzivisht se përveç Lahut, personat e tjerë që janë arrestuar janë: Gani Berisha, Sami Sinani, Labinot Vitia, Gëzim Sinani, Shukri Shabani dhe Salih Sinani. Ndërsa i dyshuari tjetër, Bajram Gashani, pronar i Bau Holding dhe Al Trade nuk është hasur ende.
