Në kuadër të hulumtimit për kompanitë që kanë futur ose kanë tentuar të fusin produkte ushqimore në Kosovë me përbërës të rrezikshëm, Veriu.info ka gjetur se dy qumështore janë urdhëruar nga Agjencia e Ushqimit dhe Veterinarisë për asgjësim të një sasi të produkteve të tyre, pasi që kanë dalë se nuk janë cilësore.
Veriu.info ka siguruar një procesverbal të inspektorëve të Agjencisë së Ushqimit dhe Veterinarisë, ku pas inspektimit të bërë në qumështoren e kompanisë “Golaj” Sh.P.K. në Gjakovë është urdhëruar asgjësimi i 100 kg djath dhe 90 kg speca me ajkë.
Kjo pasi që pas analizave laboratorike të bëra këto produkte kanë rezultuar të pakënaqshme në aspekt të higjienës.
Përmes kërkesës për qasje në dokumente publike, Veriu.info ka siguruar nga AUV edhe fotografi të bëra gjatë asgjësimit të këtyre produkteve të qumështores së kompanisë “Golaj” Sh.P.K.
Po ashtu, Veriu.info ka siguruar edhe një procesverbal të inspoktorëve të AUV të bërë më rastin e inspektimit në Qumështoren “Aldi” në Mitrovicë, e cila është njësi e kompanisë OPATIJA- COMMERCE Sh.P.K. Me këtë procesverbal konstatohet se pas analizave laboratorike jogurti 180 ml ka rezultuar i cilësisë së pakënaqshme.
Me këtë rast inspektorët e AUV kanë urdhëruar qumështoren “Aldi” të bëjë tërheqjen nga tregu të këtij jogurti dhe njëkohësisht të bëjë asgjësimin e tij.
Veriu.info ka siguruar edhe një komunikim mes qumështores “Aldi” dhe AUV të marsit 2025, tre muaj pas inspektimit, ku përfaqësuesi i qumështores kërkon nga që zyrtarët e AUV të shkojnë dhe t’i marrin mostrat e jogurtit 180 ml për testim, jogurt i cili me rastin e inspektimit ishte konstatuar me ngarkesë bakteriale.
Skandal: Prodhuan miell Tip 400 pa përbërës të duhur, dënohen mullinjtë “Amidoni” e “Blerina”
