Në kuadër të hulumtimit për kompanitë që kanë futur ose tentuar të fusin produkte ushqimore në Kosovë me përbërës të rrezikshëm, Veriu.info ka gjetur se kompanisë “Ballkan Fruits” Sh.P.K. i është refuzuar importi i qindra kilogramëve pjepër për shkak të nivelit të lartë të nitrateve, të cilat paraqesin rrezik për kancer.
Veriu.info ka siguruar vendimin e nxjerrë nga AUV, vitin e kaluar, ku thuhet mallit të sjellë nga “Ballkan Fruits” Sh.P.K. në pikën kufitare në Hani i Elezit i janë bërë analizat laboratorike për përcaktimin e nitrateve, ku niveli i tyre ka dalë 250 mg/lit, që sipas AUV është nivel shumë i lartë i nitrateve.
Duke u bazuar në këto analiza laboratorike, AUV më datë 18.06.2024 ka nxjerrë vendim për refuzim të importit të 550 kilogram pjepër për kompaninë “Ballkan Fruits” Sh.P.K.
Sipas dokumenteve që i posedon Veriu.info, kjo sasi e pjeprit nga “Ballkan Fruits” Sh.P.K. ishte blerë në Maqedoni të veriut.
Çka janë nitratet?
Nitratet janë kripëra të acidit nitrik që gjenden në ushqim. Nëse toka përmban një sasi të tepërt të plehrave azotike, atëherë produkti do të ketë nitrat të lartë. Përmbajtja e nitrateve është një tregues i cilësisë së përgjithshme të produktit. Nëse ka shumë prej tyre, produkti nuk është natyral dhe miqësor me mjedisin, përmban më pak vitamina. Pasi kemi ngrënë një produkt me nitrat të lartë, do të kemi fryrje ose dhimbje koke, në rastin më të keq – helmim. Por nëse produkte të tilla ka rregullisht, nitratet shkaktojnë shfaqjen e formacioneve malinje.
Rreziqet nga nivelet e larta të nitrateve në pjepër?
Methemoglobinemia (“sindroma e foshnjës blu”):
- Te foshnjat, nitratet mund të bllokojnë aftësinë e gjakut për të bartur oksigjenin.
- Ky rrezik është më i lartë nëse fëmija konsumon ushqime të kontaminuara ose ujë të ndotur me nitrate.
Formimi i nitrozaminave kancerogjene:
- Në stomak, nitratet mund të kthehen në nitrite dhe më pas në nitrozamina, që janë të lidhura me rrezikun për kancer të stomakut dhe ezofagut.
Stresi oksidativ dhe dëmtimi i qelizave:
- Nivelet e larta mund të ndikojnë negativisht në qelizat dhe të çojnë në inflamacion apo dëmtime afatgjata.
Simptoma akute nga ekspozimi i madh:
- Marramendje, të përziera, dhimbje koke, lodhje të tepruar.
