Derisa procesi i numërimit të votave për kandidatët për deputetë o vazhdon, gazeta Nacionale ka siguruar listën e kandidatëve më të votuar të koalicionit AAK – Nisma.
Me rreth 70 për qind të votave, më i votuari në këtë listë është kandidati i këtij koalicion për kryeministër, Ramush Haradinaj.
Pas tij, renditet Daut Haradinaj, kurse i treti në listë është kryetari i Nismës, Fatmirë Limaj.
Sipas listës që e ka siguruar gazeta, Ramush Haradinaj ka marrë 32164 vota, Daut Haradinaj 19030, Fatmir Limaj 16454, Time Kadrijaj 11366, Bekë Berisha 10899, Lahi Brahimaj 8820, Arber Tolaj 7598, Albana Bytyqi 7581, Ardian Gjini 7408, dhe Bashkim Ramosaj 7312.
Ajo që bije në sy në këtë listë është se shefi i Grupit Parlamentar të AAK-së në legjislaturën e kaluar, Besnik Tahiri, duket se nuk e ka marrë mbështetjen e duhur për të qenë deputet në këtë legjislaturë.
Kurse, Haki Abazi, i cili kishte kaluar në AAK nga VV-ja i ka marrë 1160 vota.
Burimet brenda këtij koalicioni kanë bërë me dije se në këtë numëron mungojnë një pjesë e konsiderueshme e votave nga Komuna e Pjesës.
Gjithashtu mungon edhe një pjesë e votave nga Prizreni dhe Prishtina.
Sot, Komisioni Qendror i Zgjedhjeve ka bërë të ditur se do të vazhdojë numërimi i votave të kandidatëve për deputetë në 19 qendra komunale të numërimit.
Deri dje, ishin numëruar 73.23% e vendvotimeve.
“Sipas të dhënave të pranuara nga Qendrat Komunale të Numërimit, në të cilat është duke vazhduar apo ka përfunduar procesi i numërimit të votave të kandidatëve për deputetë nga Zgjedhjet për Kuvendin e Kosovës, deri në përfundim të ditës së diel, 16 shkurt, janë numëruar 73.23% e vendvotimeve apo 1,855 nga 2,533. Procesi i numërimit të votave ka përfunduar në 19 Qendrat Komunale të Numërimit (QKN) në komunat: Deçan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Shtërpcë, Suharekë, Viti, Junik, Mamushë, Hani i Elezit, Ranillug, Partesh, Kllokot dhe Mitrovicë e Veriut. Procesi i numërimit do të vazhdojë ditën e martë, në 19 Qendra Komunale të Numërimit”, njoftoi KQZ-ja.
Kandidatët më të votuar të PDK-së dhe LDK-së
Burime të Nacionales kanë bërë me dije se sipas votave të marra në shumicën e vendvotimeve ku ato janë numëruar, ulëset i kanë siguruar Bedri Hamza, Memli Krasniqi, Uran Ismaili, Enver Hoxhaj, Jakup Nura, Përparim Gruda, Elmi Reçica, Petrit Hajdari, Ferat Shala, Abelard Tahiri, Mergim Lushtaku dhe Rrahman Rama.
Megjithatë, votat e nevojshme mund t’i marrin edhe Altin Krasniqi, Fadil Demaku, Kujtim Gashi, Artan Behrami, Nait Hasani, Ragip Xhaka, Isak Neziri apo Xhevahir Geci.
Ulëset, sipas burimeve të Nacionales, i kanë siguruar edhe Vlora Çitaku, Sala Jashari, Ganimete Musliu, Blerta Deliu dhe Ariana Musliu – Shoshi.
Në garë, ende janë Eliza Hoxha, Kosovare Murseli, Valdete Idrizi, Arbnora Salihu dhe Kristina Gashi Bytyçi.
Mbi votat e kandidatëve për deputet në Partinë Demokratike të Kosovës, Nacionale raportoi edhe gjatë së premtes.
Kreu i Lidhjes Demokratike të Kosovës (LDK), Lumir Abdixhiku, së bashku me dy nga figurat e njohura të partisë, Doarsa Kica Xhelili dhe Hykmete Bajrami, kryesojnë listën e kandidatëve më të votuar të LDK-së për deputet në zgjedhjet e 9 shkurtit 2025 në regjionin e Prishtinës, sipas burimeve të gazetës Nacionale.
Pas këtyre emrave të njohur të LDK-së, në njëmbëdhjetshën e kandidatëve më të votuar për deputet renditen: Jehona Lushaku, Kujtim Shala, Avdullah Hoti, Anton Quni, Armend Zemaj, Ekrem Hyseni, Besian Mustafa dhe Paris Guri.
Befasi e madhe rezulton padyshim performanca e Paris Gurit, i cili, ndonëse emër relativisht i ri në politikën kosovare, ka arritur të sigurojë një numër të madh votash.
Sipas rezultateve preliminare të Komisionit Qendror të Zgjedhjeve, Lidhja Demokratike e Kosovës ka marrë mbi 147 mijë vota apo 17.67 për qind, duke u renditur e treta pas Lëvizjes Vetëvendosje me rreth 340 mijë vota dhe Partisë Demokratike të Kosovës me mbi 184 mijë vota.
