Prokuroria Speciale e Republikës së Kosovës ka ngritur aktakuzë ndaj Faruk Mujkës, ish-nënkryetar i Komunës së Mitrovicës dhe aktualisht Kryeshef Ekzekutiv i N.P. “Ibër Lepenci”, si dhe ndaj Hysen Muzliukajt, ish-Drejtor për Gjeodezi, Kadastër dhe Pronë në Komunën e Mitrovicës, aktualisht në pozitën e Drejtorit të Institutit të Kosovës për Administratë Publike.
Aktakuza i ngarkon të pandehurit me keqpërdorim të pozitës zyrtare dhe mospërmbushje të obligimeve ligjore për deklarimin e pasurisë, raporton Gazeta Insajderi.
Siç thotë dosja e prokurorisë, Faruk Mujka, në cilësinë e nënkryetarit të Komunës së Mitrovicës, dhe Hysen Muzliukaj, drejtor i Drejtorisë për Gjeodezi, Kadastër dhe Pronë, dyshohen se kanë tejkaluar kompetencat për të përfituar në mënyrë të paligjshme nga shkëmbimi i pronave komunale me prona private.
Më 25 prill 2021, Faruk Mujka, duke vepruar në emër të kryetarit të Komunës së Mitrovicës dhe me ndihmën e Muzliukajt, i ka paraqitur Kuvendit të Komunës propozim-vendimin për ndërrimin e një pjese toke komunale me një pronë private. Prona komunale, në zonën e njësisë kadastrale me numër 012130, me sipërfaqe 139 m², ndodhej në lokacionin e njohur si “ish-Bankosi” në Mitrovicë, ndërsa prona tjetër ishte në emër të një qytetari të quajtur Basreta Isufi, në rrugën “Ali Zeneli”.
Dyshja, dyshohet se tejkaluan kompetencat e tyre zyrtare për të favorizuar persona të tretë, duke paraqitur Kuvendit Komunal një propozim-vendim për këmbimin e një prone si pronë komunale, ndonëse ajo ishte shpallur më parë me interes të posaçëm publik.
Veprimet e tyre dyshohet se kanë shkaktuar dëm të konsiderueshëm prej 125,100 euro Agjencisë Kosovare të Privatizimit.
Në pikën e dytë të aktakuzës, Faruk Mujka akuzohet edhe për mosdeklarim të pasurisë. Siç e përshkruan Prokuroria Speciale në dosjen e saj, në shtëpinë e Mujkës u gjetën 60 mijë euro para të gatshme. Ato para s’ishin deklaruar kurrë nga Mujka para shtetit, përkundër që kjo s’ishte hera e parë që ai po barte pozita publike.
“Nga kjo pozitë, i akuzuari Faruk Mujka, i cili sipas Ligjit në fuqi për Deklarimin, Prejardhjen dhe Kontrollin e pasurisë dhe të Dhuratave ishte i detyruar të bëjë deklarimin e pasurisë, nuk e ka bërë këtë, në atë mënyrë që nga një datë e pavërtetuar e deri me datë 15.07.2023, në shtëpinë e tij ka poseduar shumën e mjeteve monetare në lartësi prej 60,050.00 euro (gjashtëdhjetë mijë e pesëdhjetë), shumë kjo e gjetur dhe sekuestruar gjatë zbatimit të urdhërkontrollit të Gjykatës në shtëpinë e tij në Mitrovicë, të cilat nuk i kishte i paraqitur fare në formularin e deklarimit të pasurisë së vitit paraprak në Agjencionin për Parandalimin e Korrupsionit ashtu siç ishte i obliguar sipas ligjit, edhe pse e ka ditur se në deklaratë duhet paraqitur të gjitha të dhënat për shumat “kesh” që posedon”, thuhet në dosjen e Prokurorisë.
Mujka para hetuesve kishte thënë se këto para janë të ligjshme, meqë i kishte kursime për më shumë se 20 vite. Megjithatë, kjo s’ia ka mbushur syrin Prokurorisë.
“Lidhur me kartëmonedhat e gjetura në banesën e tij, në shumën prej 60,050.00 Euro, gjatë zbatimit të urdhërkontrollit, deklaron se këto të holla janë kursimet e tij gjatë gjithë viteve që kishte punuar, ngase 22 vite kishte punuar në organizata ndërkombëtare e po ashtu edhe bashkëshortja e tij punonte në bankë, prandaj të hollat ishin kursime familjare. Këto të holla, nuk i kishte deklaruar në formularin për deklarimin e pasurisë në Agjencinë kundër Korrupsionit“, vijon dosja.
Prokuroria Speciale ka prezantuar pranë Gjykatës Themelore në Prishtinë si propozim shtesë që të ndalohet ushtrimi i funksioneve në administratën publike apo shërbimin publik nga ana e Mujkës dhe Muzliukajt.
Mujka aktualisht është kryeshef ekzekutiv i ndërmarrjes publike “Ibër-Lepenc”, por që duket se s’ka ndërmend të japë dorëheqje.
Ndërkaq Muzliuka përkundër që ende ishte nën hetime, para më shumë se një muaji u shpërbyle me një pozitë të lartë nga Qeveria në detyrë e Kurtit. Ai u vendos në krye të Institutit të Kosovës për Administratë Publike.
Ministri i Punëve të brendshme në detyrë, Xhelal Sveçla, në mbledhje të qeverisëb ëri të ditur se Muzliukaj do ta udhëheq këtë institucion me mandat katërvjeçar.
