Ushtruesi i sapozgjedhur i detyrës së kryeshefit në Agjencinë Kadastrale të Kosovës, Faik Kelmendi, siç duket po ua obligon punonjësve të kësaj agjencie të jenë prezent kur shefja të vijë në objekt.
Në një email që ka siguruar Gazeta Insajderidrejtuar punonjësve të agjencisë, kërkohet që të gjithë të jenë në vendin e punës në ora 11:00 dhe të realizojnë “një pritje sa më të rregullt dhe sa më dinjitoze”.
“Ju njoftojmë se më datën 29.04.2026, duke filluar nga ora 11:00, në objektin e Agjencisë Kadastrale të Kosovës (AKK), do të zhvillohet një vizitë zyrtare nga Ministrja e Ministrisë së Mjedisit dhe Planifikimit Hapësinor, znj. Fitore Pacolli-Dalipi“, thuhet në email.
“Me këtë rast, ju lutemi që të ndërmerrni të gjitha veprimet e nevojshme për një pritje sa më të rregullt dhe dinjitoze. Po ashtu, obligohen të gjithë zyrtarët që në orën 11:00 të jenë në vendin e tyre të punës“, vijon emaili që e ka parë Gazeta Insajderi.
Pacolli para një muaji ka njoftuar se ka liruar nga detyra të ushtruesit të detyrës së Drejtorit Ekzekutiv të Agjencisë Kadastrale të Kosovës, Avni Ahmeti.
Në vend të tij, është emëruar Faik Kelmendi si ushtrues detyre në këtë pozicion.
“Ky ndryshim është pjesë e procesit të reformave dhe forcimit të kapaciteteve institucionale, me qëllim rritjen e efikasitetit dhe llogaridhënies”, tha Pacolli.
Kelmendi, siç kanë bërë të ditur burimet e Insajderit, është i afërt me kryetarin e Komunës së Obiliqit, Halil Thaçin e VV’së.
Të njëjtat burime bëjnë me dije se Valentina Ymeri është menaxhere e burimeve njerezore, por që i mban dy pozita. Njëkohësisht edhe ushtruese e detyrës së drejtoreshës së Departamentit Ligjor, ku njërën nga pozitat e ka fituar së fundmi pas ardhjes së Kelmendit në krye të agjencisë.
