Veriu.info kishte raportuar muajin e kaluar se si futbollistët e FC Vushtrria kishin mbetur pa paga për disa muaj, si pasojë e mos-menaxhimit të duhur të klubit.
Ndaj shkrimeve të Veriu.info kishte pasur reagime nga eksponentë të afërt ne drejtuesit e klubit, të cilët shkrimet i kishin quajtur tendencioze. Në përfundim të edicionit 2024/25 FC Vushtrria kishte dështuar të futet në Super Ligën e Kosovës në futboll, edhe përkundër që vitin e kaluar kishin arritur të siguronin si sponsor kryesor pronarin e INTEREX, Shaip Mikullovci.
Një sinjalizues i Veriu.info brenda FC Vushtrria ka dërguar në redaksi qarkullimin bankar të klubit nga qershori 2024 deri maj 2025, ku shihet se drejtuesit e klubit kanë pasur paga të ‘majme’, por që në fund të edicionit këto paga nuk kanë dhënë rezultat për inkuadrimin në Super Ligë të klubit vushtrrias.
Në dokumentet bankare që ka siguruar Veriu.info, shihet se drejtori sportiv i FC Vushtrria, Liridon Ahmeti ka një pagë mjaftë të majme, duke u paguar deri 2 mijë e 500 euro në muaj.
Paga e drejtorit sportiv Liridon Ahmeti është ekuivalente më pagën e futbollistit më të paguar të FC, Bujar Shabani, i cili në një muaj ka marrë 2 mijë e 500 euro, ndërsa në muajt tjerë kryesisht nga 2 mijë e 166 euro.
Kush është Liridon Ahmeti dhe pse paguhet kaq shumë?
Liridon Ahmeti është burri i motrës së Shaip Mikullovcit, sponsorit kryesor të FC Vushtrria. Ai gjatë karrierës së tij si ish futbollist ka luajtur për disa ekipe nga Kosova dhe Shqipëria, si: Flamurtari, Besa, Teuta, Llamkos Kosova, Trepça, etj.
Cilët janë shembujt nëpër botë për pagat e drejtorëve sportiv?
Veriu.info ka bërë një kërkim të thjeshtë në ChatGPT, duke pyetur se cilat janë pagat e futbollistit më të paguar në Top 5 ekipet e Premirë Ligës Angleze në krahasim me pagat e drejtorëve sportiv të këtyre klubeve, ku kanë dalë të dhëna se futbollisti më i paguar në klub paguhet pakrahasimisht më shumë se sa drejtori sportiv.
