Dy persona të kërkuar me letër-rreshtim ndërkombëtar janë ekstraduar nga Italia në Kosovë gjatë datave 12 dhe 13 mars 2026, pasi të njëjtit i ishin shmangur drejtësisë.
Lajmin e ka bërë të ditur Policia e Kosovës, e cila njoftoi se operacioni u realizua nga Drejtoria për Bashkëpunim Ndërkombëtar Policor në koordinim me institucionet e drejtësisë dhe autoritetet italiane, përmes INTERPOL.
Sipas policisë, më 12 mars është ekstraduar i dyshuari me inicialet A.B., i kërkuar nga institucionet e drejtësisë në Kosovë për veprën penale “vjedhje e rëndë”. Ndërsa një ditë më vonë, më 13 mars, është realizuar ekstradimi i të dyshuarit Xh.K., i cili kërkohej për veprat penale “vrasje në tentativë” dhe “armëmbajtje pa leje”.
Pas mbërritjes në Kosovë, të dyshuarit janë dorëzuar te njësitet përkatëse policore, përkatësisht në rajonet e Prizrenit dhe Mitrovicës, ku do të vazhdojnë procedurat e mëtejshme ligjore.
