Presidenti turk, Recep Tayyip Erdogan, zhvilloi të hënën një telefonatë me homologun e tij iranian, Masoud Pezeshkian, për të diskutuar zhvillimet e fundit rajonale, përfshirë kapjen e një rakete tjetër që shkonte drejt Turqisë.
Erdogan i tha Pezeshkian se shkelja e hapësirës ajrore të Turqisë “nuk mund të justifikohet për asnjë arsye” dhe se “Turqia do të vazhdojë të marrë të gjitha masat e nevojshme kundër kësaj”, tha Drejtoria e Komunikimit e Turqisë në një deklaratë, transmeton Anadollu Agency.
Thirrja telefonike, e cila u zhvillua me kërkesë të Pezeshkian, erdhi pasi Ministria Turke e Mbrojtjes Kombëtare tha të hënën se një raketë balistike e lëshuar nga Irani që hyri në hapësirën ajrore turke u neutralizua nga mjetet ajrore dhe të mbrojtjes raketore të NATO-s të vendosura në Mesdheun Lindor.
Të mërkurën e kaluar, ministria tha se një municion balistik i qëlluar nga Irani drejt hapësirës ajrore turke pasi kaloi Sirinë dhe Irakun u kap dhe u neutralizua nga njësitë e mbrojtjes ajrore dhe raketore të NATO-s në Mesdheun Lindor.
Turqia është “e prekur negativisht” nga konfliktet në të cilat nuk është palë, i tha gjithashtu Erdogan homologut të tij iranian.
Ankaraja nuk i miraton “ndërhyrjet e paligjshme” kundër Iranit dhe shënjestrimin e vendeve në rajon nga Irani, theksoi Erdogan, duke shtuar se shënjestrimi i vendeve vëllazërore “nuk është në interesin e askujt” dhe “këto veprime duhet të marrin fund”.
Erdogan theksoi nevojën për të rihapur derën e diplomacisë dhe tha se Turqia ka punuar në mënyrë aktive për të ndihmuar në lehtësimin e angazhimit diplomatik në rajon.
Gjatë telefonatës, ai shprehu gjithashtu “pikëllim të thellë” për një sulm vdekjeprurës më 28 shkurt në një shkollë vajzash në qytetin jugor të Iranit, Minab.
Sekretari i Mbrojtjes i SHBA-së, Pete Hegseth, tha se SHBA-të po “hetojnë” sulmin, ndërsa Izraeli ka mohuar përfshirjen.
Sulmet amerikane dhe izraelite kundër Iranit filluan më 28 shkurt, duke vrarë udhëheqësin suprem Ajatollah Ali Khamenei dhe zyrtarë të lartë të sigurisë.
Erdogan gjithashtu përsëriti ngushëllimet e tij për ndarjen nga jeta të Khameneit dhe shprehu shpresën se zgjedhja e djalit të tij, Mojtaba Khamenei, si udhëheqësi i ri suprem i Iranit do të kontribuojë në paqen dhe stabilitetin në rajon.
Nga ana e tij, Pezeshkian tha se raketat që hynë në hapësirën ajrore turke nuk ishin me origjinë iraniane dhe se autoritetet iraniane do të kryenin një hetim gjithëpërfshirës për incidentin.
