Skandali i kontratës për fabrikën e mbetjeve shtazore i nënshkruar nga Ministri i Ministrisë së Bujqësisë, Faton Peci me kompaninë LIP KS & IT SH.P.K., e cila ishte themeluar pas shpalljes për dhënien e saj me qira, ka ngjallur reagime të shumta në publik.
Pas raportimeve mediave për keqpërdorim masiv me këtë kontratë, ministri në detyrë, Faton Peci, ishte intervistuar nga Prokuroria Speciale si i dyshuar për rastin.
Mirëpo, një reagim interesant dhe legjitim e ka bërë drejtori i rrjetit të OJQ-ve AVONET, Kenan Gashi, i cili ka ngritur pikëpyetje për mundësinë e përfshirjes në këtë skandal edhe të zëvendësministrit të Bujqësisë në detyrë, Imri Demelezi, i cili është burri i ish sekretares së VV-së, Vlora Haxhimehmeti.
Postimi i Kenan Gashi:
A është i përfshirë zëvendësministri Imri Demelezi në skandalin e mbetjeve shtazore?
Ministri i Bujqësisë, Faton Peci, po përballet me akuza lidhur me skandalin e mbetjeve shtazore. Megjithatë, vëmendja publike dhe mediatike është përqendruar kryesisht te ai, ndërsa roli i zëvendësministrit Imri Demelezi pothuajse nuk është trajtuar fare. Kjo ngre disa pyetje të rëndësishme për transparencën dhe llogaridhënien institucionale.
Faton Peci është një nga ministrat më aktivë dhe të zëshëm në luftimin e dukurive negative brenda ministrisë që udhëheq. Ai ka qenë i angazhuar publikisht kundër korrupsionit dhe keqpërdorimeve, dhe për këtë është vlerësuar në disa raste. Por kjo nuk mjafton për të shmangur përgjegjësinë institucionale dhe politike që kërkon trajtim të gjithanshëm të rastit.
Prandaj, lind një pyetje e natyrshme:
Çfarë ka qenë roli i zëvendësministrit Imri Demelezi në këtë çështje?
A është ai i përfshirë në ndonjë formë në këtë skandal, apo pse nuk ka ndërmarrë veprime parandaluese në kohë?
Z. Demelezi është diplomuar në Agroekonomi në Fakultetin e Bujqësisë dhe Veterinarisë të Universitetit të Prishtinës dhe ka përfunduar studimet master në Universitetin e Bolonjës, Itali, në fushën e Zhvillimit të Qëndrueshëm të Hapësirave Bujqësore dhe Rurale. Po ashtu, ai ka kryer specializim në “Bujqësi Organike Mesdhetare” në IAM Bari, Itali.
Duke marrë parasysh këtë përgatitje të lartë akademike dhe përvojën në sektorin e bujqësisë, është e drejtë të kërkohet një përgjigje e qartë:
Pse një profesionist me këtë profil nuk ka identifikuar ose parandaluar skandale të tilla në kohën kur ka ushtruar funksione vendimmarrëse në Ministri?
Përgjegjësia në institucione publike nuk është individuale vetëm për njërin zyrtar të lartë. Ajo duhet të jetë e përbashkët, dhe secili funksionar duhet të japë llogari për kompetencat dhe vendimet që ka marrë ose ka dështuar t’i marrë.
