Gjatë hulumtimit për institucionet shëndetësore private dhe respektimin e standardeve ligjore e profesionale në Kosovë, Veriu.info ka siguruar një raport të Inspektoratit Shëndetësor, në të cilin evidentohen disa gjetje në institucionin privat shëndetësor “Cambridge Clinical Laboratories” Sh.P.K. në Prishtinë.
Raporti i inspektimit, i datës 5 janar 2026, tregon se inspektorët kanë evidentuar disqe antibiotikësh me afat të skaduar në hapësirat e laboratorit të mikrobiologjisë klinike. Në mesin e rekomandimeve të dhëna nga Inspektorati është edhe asgjësimi i këtyre materialeve.
Sipas dokumentit të siguruar nga Veriu.info, inspektimi është realizuar pas një ankese të protokolluar më 12 dhjetor 2025, që kishte të bënte me mospërputhjen e rezultateve laboratorike.
Disqe antibiotikësh me afat të skaduar
Në raportin e inspektimit thuhet se, gjatë kontrollit të hapësirave të laboratorit të mikrobiologjisë klinike, janë evidentuar materiale të përdorura për testimin e ndjeshmërisë ndaj antibiotikëve, disa prej të cilave kishin afate të skaduara.
Fotografitë e bashkëngjitura në raport paraqesin ambalazhe të disqeve për testimin e ndjeshmërisë ndaj antibiotikëve, përfshirë ampicilinën, amoksicilinën, meropenemin dhe oksacilinën. Në ambalazhet e fotografuara shihen afate skadimi gjatë vitit 2025, përpara datës së inspektimit në janar 2026.
Inspektorati ka rekomanduar që këto materiale me afat të skaduar të asgjësohen.
american hospital kosova 2 vazhdim i raportit 
Inspektimi pas ankesës për rezultatet laboratorike
Sipas raportit, kontrolli në “Cambridge Clinical Laboratories” është realizuar për shqyrtimin e një ankese lidhur me mospërputhjen e rezultateve laboratorike në analizat e uinokulturës në mes të disa laboratoreve private në Prishtinë.
Gjatë inspektimit është shqyrtuar edhe dokumentacioni përkatës, ndërsa specialistja e mikrobiologjisë klinike ka deklaruar se qëndron pranë rezultatit të lëshuar për rastin në fjalë dhe se, sipas saj, ai përputhej me gjendjen faktike të mostrës.
Në raport përmendet gjithashtu një rezultat pozitiv për bakterin Enterobacter, i regjistruar në dokumentacionin laboratorik. Megjithatë, dokumenti i inspektimit nuk përbën, në vetvete, konstatim se rezultati ishte i pasaktë.
Inspektorati kërkoi masa për ruajtjen e mostrave
Një tjetër rekomandim i përfshirë në raport lidhet me ruajtjen e mostrave të gjakut. Inspektorati ka kërkuar që ato të ruhen në një frigorifer të veçantë, me qëllim të parandalimit të kontaminimit.
Në përfundim të raportit, inspektorët kanë rekomanduar që të ndërmerren veprimet e kërkuara për adresimin e gjetjeve dhe kanë paralajmëruar se, nëse ato nuk plotësohen, mund të merren masa në bazë të Ligjit për Shëndetësi nr. 04/L-125.
Raporti i siguruar nga Veriu.info nuk dokumenton shqiptimin e një gjobe ndaj “Cambridge Clinical Laboratories” dhe as ndalimin e veprimtarisë së institucionit në kuadër të këtij inspektimi.
Veriu.info ka dërguar pyetje në adresë të “Cambridge Clinical Laboratories” Sh.P.K. lidhur me gjetjet e evidentuara në raportin e inspektimit, masat e ndërmarra për adresimin e tyre dhe përdorimin e materialeve laboratorike me afat të skaduar. Megjithatë, deri në momentin e publikimit të këtij artikulli, nuk ka pranuar përgjigje nga “Cambridge Clinical Laboratories”.
Kush është “Cambridge Clinical Laboratories”?
“Cambridge Clinical Laboratories” Sh.P.K. është komapnia e themeluar në Prishtinë në vitin 2020, ku pronarë të saj janë MaxCapital Sh.A. me 39% të aksioneve, Albana Priftar me 10% të aksioneve dhe Cambridge Pathology B.V. me 51 të aksioneve.
Aksionarja Albana (Daka) Priftaj është shtetase e Shqipërisë, ndërsa me profesion është mjeke e specializuar në fushën e mjekësisë laboratorike dhe biokimisë klinike.
MaxCapital Sh.A. është kompani e themeluar në Prishtinë në vitin 2010, ku 100% të aksioneve i zotëron kompania holandeze Tekton Investments B.V. Në vitin 2010 ishte themeluar “Lotto Sport Sh.A.” – kompani e lojërave të fatit në Shqipëri.
Ndërsa, Cambridge Pathology B.V. është kompani me bazë në Gravenhage , Gravenhage , Nassaulan 2A të Holandës, por që nuk dihet më shumë për pronësinë e saj.
LEXONI EDHE:
