Në publik shfaqet si kompani që shet dyshekë cilësor, por realiteti nuk është krejt siç prezantohet. Fjala është për zinxhirin e dyqaneve Comodita Home, që legalisht funksionon në kuadër të kompanisë “Bleuchip International” L.L.C.
Veriu.info ka siguruar një vendim të Inspektoratit Qendror të Mbikëqyrjes së Tregut, me të cilin inspektorët kanë gjobitur me 3 mijë euro “Bleuchip International” L.L.C. të Shkëlqim Devolli, që në publik njihet edhe si kompania Comodita Home.
Në arsyetimin e Inspektoratit të Tregut të Ministrisë së Tregtisë, thuhet që në bazë të ankesave të dy konsumatorëve më 19 shkurt 2026 është inspektuar operatori ekonomik “Bleuchip International” L.L.C. (Comodita Home), lidhur me pretendimet e konsumatorëve për defekte të produktit “Dyshek Hibrid”.
Me këtë rast inspektorët kishin kërkuar nga Comodita Home që t’u përgjigjet konsumatorëve bazuar në kushtet e përgjithshme të fletëgarancionit dhe në afat prej shtatë (7) ditësh të prezantojë në Inspektorat të Tregut raportet e detajuara për ankesat e konsumatorëve.
Por që kompania e Shkëlqim Devollit nuk kishte respektuar urdhëresën e inspektorëve të Ministrisë së Tregtisë, pasi që edhe pas kalimit të afatit prej (7) ditësh nuk ka prezantuar njoftimet (përgjigjet ndaj konsumatorëve) te IQMT-ja.
Pra, për shkak se Comodita Home nuk u ishte përgjigjur konsumatorëve për defektet e dyshekëve sipas fletgarancionit dhe as nuk kishte zbatuar urdhëresën e inspektorëve, më 3 mars 2026 është nxjerrë vendim për shqiptimin e gjobës prej 3 mijë euro.
Veriu.info ka tentuar të marrë një qëndrim nga “Bleuchip International” L.L.C. (Comodita Home) për këtë vendim të IQMT-së, por deri në momentin e publikimit të artikullit nuk ka pranuar përgjigje për pyetjet e dërguara.
Ndryshe, kompania që në publik prezantohet me emrin tregtar Comodita Home, në ARBK është e regjistruar me emër biznesi “Bleuchip International” L.L.C., ku 100% të aksioneve i zotëron kompania tjetër “Bluechip International Holding”.
Ndërsa, te kompania “Bluechip International Holding” 100% të aksioneve i zotëron kompania “BLU CHIP DOOEL Skopje”, e cila është e regjistruar në Maqedoni dhe ka pronar të vetëm Shkëlqim Devollin. Përfaqësues i këtyre 3 kompanive është Eroll Shabi.
