Në Gjykatën Themelore në Prishtinë, në gjykimin ndaj 13 të akuzuarve për organizim të skemave piramidale dhe bixhozit të paligjshëm, kontrabandë me mallra, shmangie tatimi dhe shpëlarje parash, edhe të enjten ka vazhduar dëgjimi i ekspertit Naser Rusinovci.
Eksperti Rusinovci tha se nuk e kishte pranuar qarkullimin bruto të raportuar nga lojërat e fatit, pasi që, sipas tij, ishte jo real, andaj kishte kërkuar nga ATK-ja librat e secilit subjekt, ku tanimë qarkullimi dallon dukshëm dhe që, sipas tij, është shuma më e drejtë e mundshme për pagesë ndaj buxhetit të shtetit.
Po ashtu, ai tha se për shkak të vëllimit të madh të lëndës dhe duke marrë parasysh shkresat e lëndës, si dhe ato që ka marrë ndërkohë nga ATK-ja dhe Policia e Kosovës, është e pamundshme që të japë fjalën përfundimtare përmes kësaj ekspertize.
Ndër tjerash, ai tha se në raportet e policisë shënohet se “aparati fizikisht mungon”, duke shtuar se, nëse mungon fizikisht, si është e mundur të konstatohet se ai ka qenë kopje e një aparati që ka qenë diku në operim, apo kur aparati nuk është sekuestruar nga policia, ndërsa vlerat e tij janë marrë, duke theksuar se aparatet nuk janë gjendur në depon e ATK-së.
Ai theksoi se në këtë situatë ka marrë për bazë vetëm aparatet me të dhëna nga ATK-ja.
Eksperti financiar tha se koha ka qenë vendimtare, por edhe metoda që ka përdorur gjatë vlerësimit dhe dhënies së opinionit nuk ka qenë gjithmonë e qëlluar, për arsye se pas disa ditësh ka marrë gjendje të re, qoftë nga ATK-ja, qoftë nga Policia e Kosovës, gjë që ka rrëzuar edhe opinionin e tij paraprak.
Ndër tjerash, gjatë marrjes në pyetje të ekspertit Rusinovci nga prokurori Abazi, mbrojtësi i të akuzuarit Dodë Rica, avokati Argjend Sefa, tha se i mbrojturi i tij nuk është marrë fare me lojëra të fatit, mirëpo prokurori po bazohet në aktakuzën ku thuhet se nuk ka deklaruar të hyra nga OUT dhe IN, gjë që, sipas tij, bie në kundërshtim me vetë provat e mbledhura nga policia.
Një gjë të tillë e potencoi edhe mbrojtësi i të akuzuarit Habil Krasniqi, avokati Asdren Hoxha.
Ndërsa, në pyetjen e mbrojtësit të të akuzuarit Kreshnik Myrtollari, avokatit Kujtim Kërveshi, eksperti Rusinovci tha se nuk ka qenë çështje e tij të vërtetojë nëse pikat e lokaleve kanë qenë në pronësi apo në shfrytëzim të subjekteve.
Paraprakisht, në këtë seancë u propozua që të bëhet veçimi i procedurës, për çka prokurori Abazi tha se nuk e kundërshtojnë, edhe pse është në interes të prokurorisë që të gjykohen të gjithë së bashku.
Mbrojtja e la në diskrecion të gjykatës, ndërsa mbrojtësi i të akuzuarit Hebibi, avokati Fazil Brahaj, e kundërshtoi me arsyetimin se procedura është në përfundim dhe, pasi që Hebibi ka qenë bashkëpunues çdoherë me organet e drejtësisë, vlerësoi se nuk ka nevojë të veçohet procedura.
Mirëpo, gjykata vendosi që të veçohet procedura ndaj të akuzuarit Bylbyl Hebibi, pasi që i njëjti nuk ka qenë prezent në seancë, edhe pse ka qenë i ftuar në mënyrë të rregullt dhe nuk e ka arsyetuar mungesën e tij.
Gjithashtu, gjyqtari Shyti tha se ndaj tij do të lëshohet urdhërarrest dhe më pas do të vlerësohen rrethanat e mungesës së tij, si dhe masat për sigurimin e pranisë së tij në këtë procedurë.
Ndryshe, Prokuroria Speciale e Republikës së Kosovës, më 8 janar 2021, ka ngritur aktakuzë ndaj të pandehurve Astrit Krasniqi, Arben Krasniqi, Istref Veliqi, Blerim Imeri, Skender Fetaj, Flakron Maqani, Armend Danqeli, Xhavit Krasniqi, Edmond Jakupi, Bylbyl Hebibi, Nexhat Ejupi, Habil Krasniqi, Kreshnik Myrtollari, Tahir Bërbatovci dhe Dodë Rica.
Sipas prokurorisë, Astrit Krasniqi akuzohet se nga 1 janar 2013 e deri më 21 mars 2019, përmes biznesit “Play 4 Win”, ka ndërhyrë në numëratorët mekanik dhe elektronik të automatëve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga vlera e pagesave të realizuara përmes shënimeve të hyrje-daljeve nëpërmjet treguesit mekanik.
Krasniqi po akuzohet se ka kontrabanduar automate ose programe kompjuterike të lidhura me to. Ai po akuzohet se ka kryer shmangie tatimore në vlerë prej 593 mijë e 680 euro e 40 centë. Të hyrat nga aktiviteti kriminal, sipas aktakuzës, i akuzuari Astrit Krasniqi i ka investuar në biznese dhe prona, duke kryer shpëlarje të parave në shumën prej mbi një milion euro.
Arben Krasniqi po akuzohet nga prokuroria se gjatë periudhës kohore 1 janar 2013 deri më 21 mars 2019 përmes biznesit “Apex Gaming Kosova”, ka ndërhyrë në 14 numëratorë mekanik dhe elektronik të automjeteve, ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga vlera e pagesave të realizuara.
Tutje ai akuzohet se duke dhënë shënime të pavërteta me të ardhurat e biznesit të tij është shmangur nga tatimi në vlerë prej 298 mijë e 547 euro e 1 cent.
Ai gjithashtu po akuzohet se ka kryer edhe shpëlarje të parave në shumën prej 75 mijë euro për biznesin e lartcekur.
Istref Veliqi po akuzohet nga PSRK-ja se nga 1 janar 2013 e deri më 21 mars 2019, përmes biznesit “Game Plus”, ka ndërhyrë në numëratorët mekanik dhe elektronik, që të mos ua paguajë lojtarëve 80% nga pagesat e realizuara. Ai akuzohet edhe se ka kontrabanduar automate ose programe kompjuterike, duke kryer shmangie tatimore në shumën prej 475 mijë e 747 euro e 79 centë. Ai akuzohet se ka kryer shpëlarje të parave në vlerë prej 698 mijë e 280 euro.
Blerim Imeri akuzohet se përmes biznesit “Matrix” SH.P.K ka ndërhyrë në një numërator mekanik dhe elektronik, që të mos ua paguajë lojëtarëve 80% nga pagesat e realizuara. I akuzuari ngarkohet se ka kontrabanduar automate ose programe kompjuterike, e ku ka kryer shmangie tatimore në shumën prej 69 mijë e 442 euro e 17 centë dhe shpëlarje të parave në vlerën prej 1 milionë e 285 mijë euro.
Skender Fetaj po akuzohet se nga 1 prill 2015 e deri më 21 mars 2019 përmes biznesit “EGKT II”, ka ndërhyrë në numërator mekanik dhe elektronik, që të mos ua paguajë lojtarëve 80% nga pagesat e realizuara. I akuzuari Fetaj akuzohet se ka kryer shmangie tatimore në vlerë prej 47 mijë e 51 euro dhe shpëlarje të parave në shumën 1 milionë e 610 mijë e 700 euro.
Flakron Maqani akuzohet se nga 12 maji 2015 deri më 22 mars 2019 përmes biznesit “Las Vegas 2” ka ndërhyrë në 27 numëratorë mekanik dhe elektronik, që të mos ua paguajë lojëtarëve 80% nga pagesat e realizuara. I akuzuari Maqani akuzohet se ka kontrabanduar automate ose programe kompjuterike, ka kryer shmangie tatimore në shumën prej 1 milionë e 399 mijë e 573 euro e 93 centë dhe shpëlarje të parave në vlerë prej 541 mijë e 745 euro.
Ndërsa, Armend Danqeli po akuzohet se nga 1 janari 2013 deri më 21 mars 2019 përmes biznesit “Euro Game”, ka ndërhyrë në numëratorët mekanik dhe elektronik të automjeteve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga vlera e pagesave. Ai gjithashtu akuzohet se në emër të biznesit të lartcekur ka kryer shmangie tatimore në shumën prej 57 mijë e 661 euro e 10 centë.
I akuzuari Xhavit Krasniqi akuzohet se nga 24 maj 2016 deri më 21 mars 2019 përmes biznesit “Invest Kosova” Sh.P.K ka ndërhyrë në 19 numëratorë mekanik dhe elektronik, që të mos ua paguaj lojtarëve 80% nga pagesat e realizuara. I akuzuari Krasniqi ngarkohet se ka kontrabanduar automate ose programe kompjuterike, ka kryer shmangie tatimore në shumën prej 251 mijë e 171 euro e 61 centë dhe shpëlarje të parave në shumën prej 185 mijë euro.
Bylbyl Hebibi po akuzohet se nga 1 janari 2013 e deri më 21 mars 2019 përmes biznesit “Real Sport”, ka ndërhyrë në pesë numëratorë mekanik dhe elektronik të automjeteve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga pagesat e realizuara.
Hebibi po akuzohet se ka kontrabanduar automate ose programe kompjuterike, se ka kryer shmangie nga tatimi në shumën prej 266 mijë e 715 euro e 61 centë si dhe ka kryer shpëlarje të parave në shumën prej 98 mijë e 112 euro.
Nexhat Ejupi po akuzohet se nga 1 janari 2013 e deri më 21 mars 2019 përmes biznesit “Lumi”, ka ndërhyrë në një numëratorë mekanik dhe elektronik të automjeteve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga pagesat e realizuara. Ai gjithashtu akuzohet se ka kontrabanduar automate ose programe kompjuterike dhe se ka kryer shmangie nga tatimi në shumën prej 45 mijë e 846 euro e 94 centë.
I akuzuari Habil Krasniqi po akuzohet se nga 28 marsi 2017 e deri më 21 mars 2019 përmes subjektit “Loni Sport”, ka ndërhyrë në numëratorët mekanik dhe elektronik të automjeteve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga pagesat e realizuara. Ai ngarkohet se ka kryer edhe shmangie tatimore në shumën prej 10 mijë e 634 euro si dhe shpëlarje të parave në shumën prej 259 mijë e 650 euro, në emër të biznesit të lartcekur.
Kreshnik Myrtollari është duke u akuzuar nga prokuroria se nga 11 janari 2018 e deri më 21 mars 2019 përmes biznesit “Club Gold”, ka ndërhyrë në tetë numëratorë mekanik dhe elektronik të automjeteve, i ka dizajnuar dhe adaptuar në atë mënyrë që me numrin total të kombinimeve të mos ua paguajë lojtarëve 80% nga pagesat e realizuara dhe se ka kontrabanduar automate ose programe kompjuterike, si dhe ka kryer shmangie tatimore në shumën prej 619 mijë e 266 euro e 90 centë.
I akuzuari Dodë Rica akuzohet se nga 2 nëntor 2017 deri më 21 mars 2019, përmes biznesit “Shqiponja Strip Club” ka kryer shmangie tatimore në shumën prej 36 mijë e 389 euro e 24 centë, përmes biznesit të lartcekur.
Ndryshe, të akuzuar në këtë rast për shmangie nga tatimi kanë qenë edhe Edmond Jakupi dhe Tahir Bërbatovci të cilët pasi që më 24 maj 2021 e kanë pranuar fajësinë, janë dënuar me 2 vite burgim me kusht dhe 2 mijë e 500 euro gjobë, raporton BetimipërDrejtësi.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
