Parlamenti i Greqisë ka miratuar të premten ligjin që ndalon përdorimin e platformave të rrjeteve sociale për të gjithë fëmijët nën moshën 15-vjeçare. Ky vendim vjen si përgjigje ndaj shqetësimeve në rritje për ndikimin negativ që mediat sociale kanë në shëndetin mendor, sigurinë dhe mirëqenien e të miturve, raporton Reuters.
Sipas legjislacionit të ri, ndalimi zyrtar do të hyjë në fuqi më 1 janar 2027.
Kryeministri grek, Kyriakos Mitsotakis, bëri të ditur se platformave të rrjeteve sociale u është dhënë afat prej 2 muaj e gjysmë për të ndërtuar mekanizma efektivë të verifikimit të moshës së përdoruesve, duke garantuar njëkohësisht edhe mbrojtjen e të dhënave të tyre private.
Përmes këtij vendimi, qeveria greke deklaron se po u del në ndihmë prindërve për të ndaluar dukurinë e scroll-it të pafundmë, i cili u merr fëmijëve kohë, gjumë, përqëndrim dhe i ndalon të qëndrojnë me miqtë.
Greqia ka marrë shembullin e Australisë e cila u bë vendi i parë në botë që kaloi legjislacionin për kufizimin e rrjeteve sociale për të miturit vitin e kaluar. Ndërsa Greqia po punon ngushtë me Bashkimin Evropian që të gjejnë një zgjidhje të përbashkët dhe teknologjikisht të sigurt për verifikimin e moshës.
