Javën e kaluar, presidentja e vendit, Vjosa Osmani, kryetari i kuvendit, Glauk Konjufca dhe kryeministri Albin Kurti, përmes një letre, dërguar raportueses së Kosovës në Këshillin e Evropës, Dora Bakoyannis, janë zotuar se do ta themelojnë Asociacionin e Komunave me Shumicë Serbe, pas anëtarësimit të Kosovës në KiE.
Në lidhje me këtë, kryetari i AAK-së, Ramush Haradinaj, ka thënë se është e kuptueshme që letra e krerëve shtetërorë, dërguar Bakoyannisit mund të jetë standard para aplikimit për anëtarësim në Këshillin e Evropës, por sipas tij, kurrsesi nuk mund të cilësohet formalitet, ashtu siç tha se e ka quajtur pushteti, teksa shtoi se gama e zotimeve në atë letër është shumë e gjerë dhe përfshin obligime konkrete.
“Ata zotohen se do të zbatojnë të gjitha nenet e marrëveshjeve të Brukselit e Ohrit, duke përfshirë edhe Asociacionin. Pyetja është, pse kanë pasur nevojë që deri me tash ta zhagisin zbatimin e kësaj marrëveshjeje e të thonë herë e zbatojmë herë nuk e zbatojmë”.
“Psh. thuhet se liderët institucionalë zotohen se “do të respektohet pavarësia e gjyqësorit dhe do të hiqet dorë nga “kritikat e tepruara ndaj gjyqësorit”. Kjo dmth se këta zotohen të heqin dorë nga diçka që e kanë aplikuar deri me tash. Aty thuhet “Të përmbahemi nga përdorimi i policisë speciale në veri të Kosovës për detyra të zakonshme policore e të sigurohemi se ato dislokohen vetëm në rast nevoje”, që i bjen se deri me tash nuk e kanë zbatuar këtë standard që aq shpesh është kërkuar nga aleatët tanë”, shkroi Haradinaj, transmeton Klankosova.tv.
Më tej, Haradinaj tha se anëtarësimi i Kosovës në KiE është ngjarje e madhe, por sipas tij, është e habitshme se si liderët e Kosovës deri më tani kanë shpërfillur kërkesat e njëjta nga nivele shumë të larta të ShBA-së dhe BE-së.
“Anëtarësimi i Kosovës në Këshillin e Evropës është ngjarje e madhe dhe hap i rëndësishëm drejt integrimit në BE dhe ndoshta letra e zotimeve drejtuar Bakojanis përfshihet në këtë kuadër, por është e habitshme se si liderët institucionalë të Kosovës, deri me tash kanë shpërfillur kërkesat e njëjta nga nivele shumë të larta të ShBA dhe BE, dhe pikërisht për këtë sot jemi edhe nën sanksione, edhe në marrëdhënie shumë të acaruara me ShBA e BE, edhe të detyruar t’i përsërisim zgjedhjet në veri, edhe të merremi me dinarin, edhe në pozitën më të keqe të mundshme në procesin e dialogut me Serbinë”, tha ai.
