Kreu i AAK-së, Ramush Haradinaj, ka bërë edhe një reagim lidhur me incidentin e ndodhur mbrëmë në Veri të vendit ku me eksploziv është dëmtuar kanali i ujit të Ibër-Lepencit.
Haradinaj ka thënë se vlerëson lartë institucionet e sigurisë për reagimin e shpejt dhe vendosjen në kontroll të sigurisë.
Kandidati për kryeministër, ka thënë se sulmi i ndodhur të premten e 29 nëntorit është sulm me përmasa terroristë dhe akti më barbar në gjithë periudhën e pasluftës.
Haradinaj ka thënë se ngjarja e ndodhur është shumë më serioze se një luftë hibride, propaganda kundër opozitës dhe mediave e analistëve siç po provon të devijojë Kurti. Kreu i AAK-së ka thënë se sulmet e tilla s’janë kalkulator për vota.
“Situata e krijuar është shumë më serioze se një luftë hibride, apo propagande kundër opozitës, medias e analistëve, siç po provon ta devijojë Kryeministri. Sulmet me përmasa agresioni kundër vendit tënd, nuk janë kalkulator për vota”, ka shkruar Haradinaj..
Në fund kreu i AAK-së ka thënë se aleanca me SHBA-në është përgjigja më e mirë ndaj Rusisë dhe satelitit të saj Serbisë.
Postimi i plotë:
Në mbrojtje të Kosovës, me çdo çmim!
I vlerësoj lartë institucionet e Sigurisë dhe emergjencave për reagimin e shpejtë e të vendosur në vendosjen nën kontroll të situatës në veri të vendit. Përgjegjesit duhet ta marrin përgjigjen e merituar. Qëndrojmë afër dhe të vendosur si kurrë më parë në mbështetje të Policisë, AKI-së, Zjarrfikësve dhe tërë asaj armate të emergjencave që po e bëjnë këtë punë.
Sulmi i mbrëmshëm me përmasa terroriste ndaj infrastrukturës së ujit në veri, shënon aktin më barbar kundër Kosovës në krejt periudhën e pasluftës dhe është sulm i drejtpërdrejtë ndaj popullit të Kosovës. Ai për cak ka pasur nxjerrjen jashtë funksionit të dy segmenteve jetike, furnizimin me ujë dhe energji, me qëllim shkaktimin e një krize me përmasa të paparashikueshme. Skenarë të tillë sot shohim veç në agresionin rus ndaj Ukrainës.
Prandaj sot, përpos dënimit me forcë ndaj këtij sulmi terrorist, gjithë energjitë tona duhet të fokusohen në zbulimin dhe kapjen e kriminelëve dhe në zbardhjen e skenarëve për destabilizimin e Kosovës. Për këtë qëllim e kemi të domosdoshme edhe ndihmën e partnerëve strategjikë të sigurisë, apo një hetim
ndërkombëtar.
Situata e krijuar është shumë më serioze se një luftë hibride, apo propagande kundër opozitës, medias e analistëve, siç po provon ta devijojë Kryeministri. Sulmet me përmasa agresioni kundër vendit tënd, nuk janë kalkulator për vota.
Në mbrojtje të Kosovës, me çdo çmim!
Aleanca me 🇺🇸 është përgjigja më e mirë ndaj Rusisë dhe satelitit të saj, Serbisë!
