Ish-kryeministri Avdullah Hoti, ka reaguar sërish pasi ShBA-ja vendosi sanksione serioze ndaj KOsovës, duke e përjashtuar kështu edhe nga ushtrimi ushtarak “Defender Europe 2023”.
Sipas tij, “Mos-koordinimi i politikës tonë shtetërore me Amerikën është politikë antishtetërore”.
Prandaj, deputeti i LDK-së thotë se një qeveri që sillet kështu duhet larguar menjëherë. Ai shtoi se Kosova nuk e meriton një qeverisje të tillë të udhëhequr nga kryeministri Albin Kurti.
“Kosova nuk e meriton një qeverisje të tillë. Po e shihni vetë. Kjo ka qenë arsyeja që ne si LDK e kemi rrëzuar një qeveri antiamerikane në fund të marsit 2020. E pësuam politikisht në zgjedhje, por e ruajtëm Kosovën”, ka shkruar ai në Facebook.
Ambasadori amerikan në Kosovë, Jeffrey Hovenier, tha se Qeveria e Kosovës nuk është koordinuar me Shtetet e Bashkuara për veprimet e ndërmarra në veri dhe, për këtë arsye, ka pësuar pasojën e parë: “stërvitjet Defender Europe 2023 kanë marrë fund” për të.
Ai iu referua vendimit të Qeverisë së Kosovës për t’i instaluar me forcë kryetarët shqiptarë të komunave me shumicë serbe në veri të vendit – Zveçan, Zubin Potok dhe Leposaviq – përkundër rezistencës së vazhdueshme të banorëve lokalë, që rezultoi në dhunë.
“Kur kemi marrë vesh, kemi reaguar ashpër kundër. Vendimi [i Qeverisë] ka pasur ndikim negativ në reputacionin e Kosovës dhe i ka kthyer mbrapsht përpjekjet për normalizimin e marrëdhënieve mes Kosovës dhe Serbisë”, tha Hovenier.
