Deputeti i CDU-së në Gjermani, Peter Beyer ka dhënë intervistë për Indeksonline. Ndër të tjera politikani gjerman, mik i madh i Kosovës ka analizuar Procesin e Berlinit kur po bëhen afro 10 vjte nga formimi i saj.
Beyer ka folur edhe për zgjedhjet në SHBA dhe ndikimin që mund të kenë këto zgjedhje në rrjedhat e politikës në Kosovë.
10 vjet nga Procesi i Berlinit, cili është vlerësimi juaj?
I jam shumë mirënjohës kancelares Angela Merkel për nisjen e kësaj nisme dhjetë vjet më parë. Ky është një projekt i përgjithshëm pozitiv për shtetet e Ballkanit Perëndimor. Procesi i Berlinit është një mundësi e rëndësishme për vendet kandidate për të punuar më ngushtë së bashku. Shpresoj se këtu do të fitohet më shumë momentum – disa marrëveshje dhe aranzhime kanë mbetur vetëm qëllime, por tani duhet të zbatohen, për shembull ajo e Tregut e Përbashkët Rajonal. RYCO, nga ana tjetër, është një projekt që ia vlen të mbështetet dhe i bashkon të rinjtë. Vendi i fundit që u pranua si anëtar në BE ishte Kroacia në vitin 2013. Që atëherë, Ballkani Perëndimor ka ngecur dhe nuk ka lëvizur në rrugën drejt Bashkimit Evropian.
Sa realiste janë perspektivat e Kosovës në BE?
Një gjë është e qartë, e ardhmja e Republikës së Kosovës është në Bashkimin Evropian dhe si anëtare e plotë. Kjo është në interes të të dyja palëve. U gëzova shumë kur liberalizimi i vizave u bë realitet, për të cilin të gjithë luftuam, më në fund hyri në fuqi në fillim të vitit. Por duhet të kishte ndodhur më shpejt. Mendoj se besueshmëria në kredibilitetin e BE-së është dëmtuar për faktin se janë ende pesë shtete anëtare të BE-së që nuk e njohin Kosovën si shtet të pavarur. Aktualisht po diskutojmë intensivisht se si mund t’i lidhim më ngushtë shtetet e Ballkanit Perëndimor me BE-në në një fazë të hershme. Fjala kyçe këtu është: Anëtarësimi i asociuar në rrugën drejt anëtarësimit të plotë. Kjo mund të shërbejë si motivim, si për vendet që synojnë anëtarësimin, ashtu edhe për BE-në.
Çfarë rëndësie kanë zgjedhjet e ardhshme presidenciale në SHBA për Kosovën dhe çfarë mund të presim nga një mandat i mundshëm i Donald Trump?
Para së gjithash, Evropa – jam i bindur se zgjedhjet për Parlamentin Evropian në fillim të qershorit të këtij viti dhe përbërja e re e Komisionit Evropian me Ursula von der Leyen në krye, do të sjellë një erë të re në Bruksel, veçanërisht në lidhje me politikën e zgjerimit të BE-së. Në të kaluarën, shefi i politikës së jashtme të BE-së, Josep Borrell, nuk ka vepruar me sukses, dhe Miroslav Lajçak, si përfaqësues i posaçëm i BE-së për procesin e normalizimit ndërmjet Serbisë dhe Kosovës, gjithashtu nuk ka qenë në gjendje të përmbushë pritjet për përparim të konsiderueshëm dhe në masë të dëshiruar, në detyrat e tij. Kam shumë shpresa se do të plotësohen të dyja pozitat. SHBA-të kanë qenë gjithmonë një mik veçanërisht i ngushtë i Kosovës. Edhe ne gjermanët kemi shumëçka për të falënderuar miqtë tanë amerikanë. Nga njëra anë, është e rëndësishme se kush bëhet personi më i fuqishëm në botë për katër vjet, por nga ana tjetër, mandati i një presidenti amerikan është gjithashtu i kufizuar në kohë. Për momentin nuk e dimë ende se kush do të fitojë zgjedhjet në SHBA më 5 nëntor – Trump apo Harris. Do të jetë një garë e ngushtë, kjo është e sigurt. Harris pritet të ndjekë një politikë pro-Kosovës, për të mirë, në rrugën transatlantike, ndërkohë që mund të kemi frikë nga një politikë e “presionit maksimal” nga Trump 2.0. Sipas mendimit tim, kjo nuk do të ishte shenjë e mirë për Ballkanin Perëndimor, sepse mund t’i detyrojnë të bëjnë një “marrëveshje të pistë” për lëvizjen e kufijve ose shkëmbimin e tokës. Ne e refuzojmë fuqishëm këtë, ka thënë Peter Beyer për Indeksonline.
