“Të mjerë dhe të poshtër” e ka quajtur kryediplomaten në detyrë, Donika Gërvallën, ish-analisti përkrahës i Lëvizjes Vetëvendosje, Bleron Baraliu.
Kjo, pasi që Baraliu rikujtoi dy shkrime të Gërvallës e cila përdorte fjalët më të rënda për ish-shefin e Grupit Parlamentar të Lëvizjes Vetëvendosje, Rexhep Selimin, i cili ndodhet në Hagë bashkë me ish-krerët e UÇK’së, shkruan Insajderi.
“Kjo injorante është bërë ministre dhe zkm mu me siglën e Albin Kurtit. Kur po pyesin njerëzit a kam ndryshuar unë a Kurti, le ti referohen kritikave të mia të ashpra para 4+ vitesh kur Kurti fuqizoi një imbecile të plotë që të udhëheqte gjithë diplomacinë kosovare drejt zhbërjes së asaj mini politike të jashtme që mezi kishim ndërtuar. Shikoni sa e mjerë dhe e poshtër është kjo”, ka shkruar Baraliu.
Shkrimet e Gërvallës janë të datës 7 shkurt 2020 dhe 25 mars 2020, të publikuara në ‘Facebook’. Në shkrimin e parë, Gërvalla e quan “sinjal të shëmtuar” propozimin e Selimit si shef i grupit parlamentar të Lëvizjes Vetëvendosje atëbotë, meqë “Rexhep Selimi është nëj prej të dyshuarve të Hagës”.
Ndërkaq në shkrimin e dytë e quan “të gërditshme” faktin që Selimi ka folur për shtetin e së drejtës.
“Fakti më i shëmtuar që as LVV nuk ka arritur të çlirohet tërësisht nga figurat e saj të diskretituara të botës së krimit”, thuhet ndër të tjera në shkrimin e dytë të Gërvallës.
