Matematikani shqiptar në ShBA, Bleron Baraliu e ka prezantuar të shtunën në mbrëmje parashikimin e tij për zgjedhjet e 9 shkurtit, duke u bazuar në një model online të cilin ai e kishte përdorur edhe në zgjedhjet e vitit 2021.
Sipas parashikimit të Baraliut, të publikuar ende pa u hapur kutitë e votimit të dielën në Kosovë, Vetëvendosje pritet të shkojë deri në 41.3 për qind të votave.
Ai e ka parashikuar PDK-në si partinë e dytë në vend, me 20.3 për qind, ndërsa LDK-në të tretën me 17.4 për qind.
Parashikimi i Baraliut e rendit si subjektin e katërt më të votuar në vend koalicionin AAK-Nisma me 6.7 për qind.
Në vitin 2021, me modulin e njëjtë të përdorur, Baraliu kishte parashikuar se VV-ja do të merrte 52 deputetë. Pas certifikimit të rezultateve finale, VV-ja kishte marrë 58 deputetë. Ai, asokohe e kishte parashikuar PDK-në me 22 deputetë, e që sipas rezultateve finale kishte fituar 19 ulëse në kuvend.
