Debati i ndezur ditët e fundit lidhur me rolin e influencuesve në Shqipëri, i nisur fillimisht nga ironia publike e kryeministrit Edi Rama, ka degraduar në ofendime të rënda personale në studiot televizive.
Mbrëmjen e kaluar, i ftuar në emisionin “Top Story” përballë moderatores Grida Duma, gazetari Bledi Mane ka lëshuar akuza dhe fyerje të forta në drejtim të ish-banores së BBVA dhe influencueses së njohur, Dea Mishel.
Gjatë diskutimit, Mane u shpreh me gjuhë denigruese: “Nga Dea Mishel doli miu në Top Channel. Erdh Dea Michel dhe doli miu… Një femër që nuk kujdesej për higjienën personale, një femër që nuk lante enët, s’mbolli një lule!”
Kjo deklaratë e tij ka sjellë ndërhyrjen e moderatores Grida Duma, e cila i ka kërkuar të ndalojë: “Stop! Tha Grida, s’ta lejoj këtë”, ndërsa gazetari u përgjigj se kjo ishte përgjegjësia e tij. Pas kësaj, Duma ka insistuar prerë: “Stop Bled, pusho se do ta heq mikrofonin dhe s’do ta vazhdosh më…”
Edhe pse në studio pati një tentativë për të ndalur gjuhën e urrejtjes, reagimi i vërtetë ka shpërthyer pas emisionit. Shkak është bërë vendimi për të publikuar në Instagram vetëm videon pikërisht nga momenti i ofendimit. Përmes një letre të hapur publike drejtuar Grida Dumës, Dea Mishel u shpreh e tronditur dhe e zhgënjyer.
“Jam e zhgënjyer nga fakti që në një program me kohëzgjatje 1 orë e 22 minuta, highlight-i i vetëm që ti zgjedh të shpërndash në llogarinë tënde në Instagram është momenti kur une po denigrohem duke u përdorur shpifje, ashtu siç nuk do e meritonte asnjë vajzë!” – shkruan influencuesja.
Ajo shton se ndonëse Grida e cilësoi të palejueshme në studio, biseda përsëri vazhdoi, duke argumentuar se fjalët e moderatores ishin thjesht sa për të dalë e larë nga ajo situatë dhe jo për ta mbrojtur atë me vërtetësi.
Më tej në reagimin e saj, Dea Mishel hedh dyshime se ky sulm televiziv mund të jetë i qëllimshëm dhe i lidhur me dy arsye: përfshirjen e saj aktive në protestat e fundit qytetare ose hakmarrje për shkak se ajo ka refuzuar të jetë e pranishme në emision.
“Do ishte më e ndershme ta shprehnit haptazi se ju ka hidhëruar refuzimi im për ftesën tuaj, ndaj po shikoj këto klipe sot. Klipe, që siç kanë komentuar dhe të tjerë, përngjajnë me gjyqet e një sistemi të kaluar,” shkruan ajo, duke theksuar se nuk mund të nxjerrin asgjë të shëmtuar prej saj përmes këtyre provokimeve të ulëta.
Në mbyllje të mesazhit të saj, Dea Mishel e konsideron këtë sulm si “koston e lirisë” së saj për të folur dhe vepruar siç dëshiron. Ajo i dërgon edhe një mesazh të fundit moderatores duke i thënë: “Më lejo të të them që mendoj se je në anën e gabuar të historisë.” Influencuesja ka zgjedhur t’i përgjigjet këtij sulmi duke ftuar ndjekësit të bashkohen sërish në shesh për të vijuar kauzat e tyre qytetare.
