Policia e Hungarisë ka njoftuar se si rezultat i një veprimi të koordinuar nga Byroja Kombëtare e Hetimit (NIB) e Policisë së Emergjencave dhe Administrata Kombëtare e Taksave dhe Doganave (NAV), janë sekuestruar armë zjarri dhe produkte duhani në një autobus nga Kosova në dalje tē autostradës M5, raporton Veriu.info.
Rasti ka ndodhur me 24 qershor, ku oficerët e policisë kanë gjetur katër objekte që dukeshin si armë në një ndarje të prodhuar në fabrikë nën sediljet pranë shoferit.
“Ata u përpoqën t’i mbulonin ato me tre qese me cigare të pavulosura, dhe gjithashtu konfiskuan produkte duhani të pavulosura nga 12 pasagjerë në autobus. Ekzaminimi i ekspertëve përcaktoi se sendet e sekuestruara ishin armë zjarri të kalibrit 7.65 mm të konvertuara nga armë me gaz dhe armë alarmi. Njëra prej tyre përmbante gjashtë fishekë”, thuhet në njoftimin e policisë hungareze, raporton Veriu.info.
Bëhet e dituri se hetuesit kanë marrē në pyetje shoferin 42-vjeçar, nën dyshimin e arsyeshëm për krimin e keqpërdorimit të një arme zjarri ose municioni, i cili më pas është dërguar në paraburgimit me urdhërarrest të gjykatës.
Veriu.info mëson se autobusi në të cilin janë gjetur katër armë zjarri të kalibrit 7.65 mm, i takon kompanisë Pranvera Travel nga Peja.
