Kreu i KEK-u deklaroi sot se nuk do të ketë
ndërprerje të energjisë elektrike, pas raportimeve për mungesë të theksuar të prodhimit vendor, shkruan Mitropol.
“Nuk do të ketë ndërprerje të energjisë elektrike, këtë ta kemi të qartë,” u shpreh Kryehshefi Ekzekutiv, Gramos Hashani, në konferencë për media.
“Ne sot kemi deklaruar kapacitetet e prodhimit të cilat i kemi planifikuar për nesër. Ka pasur pasiguri nga ekipi i termocentralit ‘Kosova A’ për ta deklaruar atë kapacitet. Kjo është keqkuptuar dhe janë dhënë deklarata të ndryshme, me të cilat ne nuk merremi, që KEK-u për herë të parë pas 25 vjetësh nuk prodhon asnjë megavat brenda ditës. Kjo nuk është e vërtetë. Ne jemi angazhuar maksimalisht dhe kemi bërë korrigjim të kapaciteteve që njësia A3 do të prodhojë edhe nesër”, ka shtuar Hashani.
“Ne vetëm e prodhojmë energjinë elektrike, e deklarojmë një ditë përpara. Është korrigjuar njoftimi se nesër prodhojmë 110 megawat në orë nga njësia A3”, ka thënë ai.
KEK-u, sipas tij, është në procez modernizimi e shtimi të kapaciteteve.
“Kjo është e natyrshme dhe qëndron te vjetërsia që kemi. ‘Kosova A’ ka 60 vite, ‘Kosova B’ i ka 40 vite, kjo e funda është në proces të modernizimit. Ndërkaq për ‘Kosova A’ e kemi njësinë ‘A3’, për të cilin e kemi hapur tenderin me 137 milionë euro modernizim dhe rehabilitim”, ka shtuar kryeshefi.
KESCO sot paralajmëroi se nga nesër e në ditët në vijim, pritet të nisë një mungesë e theksuar e prodhimit vendor, transmeton IndeksOnline, ku është kërkuar kursimi i rrymës elektrike nga qytetarët.
Lajmin e ka mohuar KEK, ku tha se nuk ka kolaps në prodhim e do të ketë operim normal./Mitropol/
