Shefi i tenderëve në BQK, Valon Lepaja është denoncuar në Prokurori. Firma private që e bëri këtë, po e akuzon se ka keqpërdorur detyrën zyrtare. Lepja deri tash nuk ka pranuar që të përgjigjet
Në vitin 2024 Banka Qendrore e Kosovës kishte shpallur një tender për furnizim me gjenerator, një pajisje kjo tejet e domosdoshme për institucionin në të cilin ruhen të dhënat e krejt parave të qytetarëve të Republikës.
Interesim për këtë tender kishte shprehur edhe firma private “Okta Electronics”, që drejtohet nga Avni Veseli.
Por, derisa ai, në kallëzimin penal të deponuar në Prokurori, thotë se i plotësonin kushtet për tu shpërblyer me kontratë, akuzon shefin e tenderëve në BQK, Valon Lepaja se e anuloi më shumë se një herë këtë tender.
Për këtë,, ai po pretendon që shefi i prokurimeve në BQK, Lepaja ka kryer veprën penale “Keqpërdorimi i pozitës apo autoritetit zyrtar nga neni 414 i Kodit Penal të Kosovës.
Por, si ndodhi krejt ky veprim i Lepajës, sipas denoncuesit, dokumentin e të cilit e ka siguruar Insajderi?
“Ne kemi aplikuar për herë të parë në vitin 2023, për të njëjtin Tender ”Furnizim me gjenerator për nevoja të BQK-së”, pranë BQK-së me Nr të prokurimit BQK 23 051 121. Po në këtë tender ne kemi dhënë ofertë në shumën prej 76,950.00 Euro për dallim me ofertuesin e dytë, i cili kishe dhënë ofertë prej 77,787.00 Euro. Ku i njëjti tender ishte anuluar pa dhënë ndonjë arsye konkrete», thuhet në denoncimin e firmës private kundër Lepajës.
Po ashtu pas anulimit, sipas denoncuesit, tenderi u ri-hap edhe një herë po nga Lepaja.
“..kemi aplikuar përsëri për herë të dytë për tenderin ”Furnizim me gjenerator për nevoja të BQK-së” pranë BQK-së me Nr. prokurimit BQK 24 009 121. Ne në tenderin e dytë kemi jap ofertë me shumën e çmimit 74,45().0() euro, shumë kjo që është ekuivalente me obligimet e shërbimit-furnizimit ndaj BQK-së”, thuhet në kallëzimin penal.
Mirëpo përsëri tenderi I dytë ishte anuluar. Po nga departamenti që drejtohet nga Valon Lepaja.
“është anuluar pa as edhe një format, e ne kemi parashtruar ankesë ne BQK për qasje në dokumente dhe me vendim është refuzuar pjesërisht dhe jemi udhëzuar që të bëjmë ankesë në Agjencinë për Informim dhe Privatësi”, i rrëfen biznesmeni Prokurorisë.
Ai thotë se duke marrë parasysh “që kemi qenë ofertues serioz dhe njëherit duke pasur dyshime për tenderin në fjalë, pasi që është anuluar për të dytën herë rresht, ne kemi ndjekur procedurat”.
Çka gjeti në këto letra?
Sipas denoncimit, del që firma që tashmë ka ushtruar kallëzim penal për këtë tender të furnizimit me gjenerator për BQK-në, në fakt ishte përzgjedhur si fituese e tenderit nga komisioni.
“Pas pranimit të Ankesës që e kemi parashtruar në Agjenci për Informim dhe Privatësi është obliguar Banka Qendrore e Kosovës — divizioni I prokurimit që të hapë dosjen dhe te na dërgojë raportin e vlerësimit nga ana e komisionit dhe në të njëjtin vlerësim del të jetë që ne jemi përzgjedhur nga anëtarët e komisionit”, thuhet në kallëzim penal dhe ngritën dyshime që vet shefi i prokurimeve, Valon Lepaja, e anuloi tenderin për t’ia dhënë një firme tjetër pastaj.
Gazeta Inajderi e ka pritur për javë të tëra zyrtarin e BQK-së, Valon Lepja për ta komentuar këtë denoncim, duke i ofruar edhe një kopje të dokumentit, por i njëjti nuk është përgjigjur deri tash.
As Prokuroria nuk ka konfirmuar as nisjen e hetimeve, as nëse të njëjtat i ka mbyllur dhe sipas ligjit të ofroi qasje në dokumentin eventual të mbylljes së hetimeve.
