Deputetja e Lidhjes Demokratike të Kosovës (LDK), Dorasa Kica-Xhelili, ka reaguar pas thirrjeve raciste dhe antishqiptare që u dëgjuan në një ndeshje në Kumanovë, duke kritikuar sidomos mungesën e reagimit nga përfaqësuesit shqiptarë në institucionet e Maqedonisë së Veriut.
Në një postim në Facebook, ajo e cilësoi atë që ndodhi në stadium si më shumë se thjesht brohoritje.
“Ato që u dëgjuan në stadiumin e Shkupit s’ishin thjesht brohoritje, por zhurma primitive e një mendësie të kalbur. E megjithatë, më e neveritshme se kjo zhurmë është heshtja që e shoqëroi”, ka shkruar deputetja.
Sipas saj, çdo akt që nxit urrejtje meriton reagim të menjëhershëm, veçanërisht nga përfaqësuesit shqiptarë në qeverinë e Maqedonisë së Veriut.
“Çdo akt nxitjeje urrejtjeje meriton reagim të menjëhershëm, por mbi të gjitha, nga ata që sot përfaqësojnë shqiptarët në institucionet e Maqedonisë së Veriut. Heshtja nuk është maturi, është bashkëfajësi. Të jesh në qeveri dhe të mos reagosh kur fyhet identiteti yt, nuk është as politikë, as pragmatizëm – është dorëzim”, theksoi Kica-Xhelili.
Ajo përfundoi me një pyetje të drejtpërdrejtë: “Nuk e di kush prisni të jetë për ne shqiptarët kur nuk jemi për veten?”.
