Një futbollist brazilian që u transferua verën e kaluar nga RPE Parintis, një skuadër e kategorive të ulëta të futbollit në Brazil, te Ulpiana në Kosovë, e pa tmerrin me sy.
Për një vit angazhimi te klubi nga Lipjani, 26-vjeçari Lucas Cunha mori vetëm tre rroga. Dikur mbeti edhe pa para, pa ushqim e pa energji elektrike në banesën e tij në Lipjan.
Mesfushori brazilian dëshmoi për përvojën e tij të tmerrshme kosovare në një deklarim për televizionin T7.
“Kam një shok që është mik me ish-trajnerin, erdha këtu. Presidenti e pa videon time dhe erdha. Këtu erdha me 16 gusht, më dhanë vetëm 3 paga vitin e kaluar. Këtë vit nuk më kanë dhënë asnjë cent. Kam folur me klubin, por nuk më kanë dhënë para”, tha ai në një deklarim në maj të këtij viti.
Në veçanti, braziliani e akuzoi presidentin e klubit Ulpiana, i cili financohej nga afaristi milioner Abedin Salihun. Salihu është kryetar i Kryesisë dhe financuesi kryesor i klubit.
“Është qytet shumë i mirë dhe klub i mirë, por presidenti nuk më ndihmon, nuk më paguan ushqim, as rrymën në banesë. Fola me shokët e ekipit, ata më thanë se do të më ndihmojnë. Nuk kisha para, nëse do t’i kisha, do ta paguaja biletën”, tha Cunha.
Megjithatë, për t’ia lehtësuar përvojën në Kosovë qe lidhja e tij me bashkëlojtarët vendorë. Ata i dolën në ndihmë mesfushorit brazilian dhe morën një iniciativë për të mbledhur para me qëllim financimin e një bilete aeroplani për shokun e tyre të skuadrës që të mund të udhëtonte për në vendlindje.
Rreth një muaj më vonë, ai është kthyer sërish në Kosovë. Tash si transfer i lirë te skuadra e ligës së parë, KF Trepça, me të cilën ka lidhur një marrëveshje një-vjeçare.
Ndërsa, kryetari i klubit të cilin ai e akuzoi për shkelje të marrëveshjes vitin e kaluar është një afarist milioner i njohur për probleme me ligjin, por edhe si pronar i një kompanie të fuqizuar nga kontratat e prokurimit publik.
Hiç më larg se para katër muajsh, kompania N.T.SH. ‘Dino’ në pronësi të Abedin Salihu, që është edhe president i klubit Ulpiana nga Lipjani, fitoi një tender mbi tre milionësh në Komunën e Prishtinës.
“Dino” është një biznes i cili ndërton objekte banesore dhe jobanesore. Në Agjencinë për Regjistrimin e Bizneseve, “Dino” Sh.P.K. figuron të ketë kapital prej rreth 150 mijë euro. Përpos Abedin Salihut, aksione në kompani kanë deklaruar edhe dy familjarët e tij: Ramadan dhe Ibrahim Salihu.
Abedin Salihu, po ashtu është pronar i njërit prej hoteleve më të famshme të Brezovicës, të emërtuar me emrin e njëjtë sikurse të resortit turistik.
“Brezovica Hotel Spa”, është regjistruar si biznes i hotelierisë katër vite më parë.
Pikërisht për këtë hotel të ndërtuar në një nga resortet më të vizituara turistike në vend, Abedin Salihu ishte vënë në ndjekje nga Policia e Kosovës në mars të vitit 2022. Dyshohej për përfshirje në aferën e famshme të njohur me emrin e njëjtë ‘Brezovica’, që përfundoi me dhjetëra të arrestuar. Dyshohej për keqpërdorime e shkatërrim të mjedisit.
Por, Salihu kishte vendosur të sfidonte shtetin. Ishte arratisur jashtë vendit, derisa Policia kryente bastisje në pronat e tij.
Afaristi Salihu ishte dorëzuar në Polici pas më shumë se shtatë ditësh në arrati.