Gjykata Kushtetuese sot ishte në thumb të linçimeve, kritikave e sulmeve nga Lëvizja Vetëvendosje.
Kjo pasi me aktgjykim, u konstatua se nuk lejohet votimi i mbyllur, dhe se një kandidat për kryetar të Kuvendit, nuk mund të kandidohet më shumë se tri herë.
Por, vetëm pak vite më parë, Vetëvendosje kënaqes nga vendimet e Gjykatës Kushtetuese.
Në vitin 2020 kur Gjykata Kushtetuese rrëzoi qeverinë Hoti si pasojë e votës nga një deputet i dënuar me vendim të formës së prerë, të gjithë ishin të kënaqur dhe lavdëronin Kushtetuesen.
Duke nisur nga Albulena Haxhiu, Albin Kurti, Blerim Sallahu e të tjerë. Sot, të gjithë kanë kthyer shigjetat në anën e kundërt.
“Pas shtatë muajve na u dëshmua ajo që dihej nga fillimi. Zgjedhja e qeverisë koti ka qenë kot. Zgjedhje e paligjshme, jokushtetuese. Kemi humbur shumë vite, jo vetëm muaj. Këto zgjedhje nuk janë të parakohshme por të vonuara. Mirëpo, këto zgjedhje janë referendum. Me 14 shkurt politika e keqe ndodhet para gjyqit popullor. Punë e arsim, drejtësi e shëndetësi. Kaq duan qytetarët. Qeveria jonë e re do të jetë shërbim i mirë. Sepse qytetari është mbreti i republikës”, shkruante Albin Kurti.
Ministrja e drejtësisë në detyrë sot, Albulena Haxhiu, aso kohe, thoshte se e kanë pritur vendimin e Gjykatës Kushtetuese, dhe se ishte vendim i duhur.
“Ne e vlerësojmë vendimin. Po presim ftesën nga ushtruesja e detyrës së presidentes znj. Osmani, e cila e ka për detyrë të ftojë partitë politike për të marrë vendimin e tyre për datën e zgjedhjeve të reja”, deklaronte Haxhiu.
E ai që në atë kohë e mbrojti këtë çështje në emër të VV-së, Blerim Sallahu, i njohur si Vaji në tepsi, ishte tejet i lumtur me vendimin.
“Vullneti i votuesve dhe integriteti i Kuvendit janë parime e vlera të pakapërcyeshme. Ishim të bindur se përveç ilegjitime, ishte edhe antikushtetuese. Një deputet i dënuar me vendim të formës së prerë me një vit e më shumë burg, nuk mund të jetë deputet, e një Qeveri e varur nga vota e tij nuk mund të jetë Qeveri. Ky ka qenë thelbi kërkesës tonë. Për këtë kemi qenë të bindur. Këtë e konfirmoi sonte Gjykata Kushtetuese. Ata që ditën e bënë natë, sonte e morën përgjigjen, kurse nata se s’ndriçoi. Ju faleminderit të gjithëve që na mbështetet, e urime qytetarëve të mirë të këtij vendi!”, kishte shkruar ai.
Sot ‘sahati’ është rrotulluar në anën e kundërt. VV-ja, ashtu sikur me të gjitha vendimet, kur iu pëlqejnë, vendimet janë të mira, kur nuk iu pëlqejnë, drejtësia është e kapur.
I pari që i ka nisur kritikat ndaj Kushtetueses ka qenë deputeti Hekuran Murati, i cili me profesion është ekonomist.
“Në vitin 2014, për ta mbajtur PDK-në me çdo kusht në pushtet, Gjykata Kushtetuese ishte bërë vegël e PDK-së dhe kishte vendosur që: 1. Qeveria nuk mund të formohej pa fituesin e zgjedhjeve, pra PDK-në. Nëse nuk ishte PDK-ja në Qeveri, vendi duhej të shkonte në zgjedhje. 2. Pozita e Kryetarit të Kuvendit i takonte fituesit të zgjedhjeve, pra PDK-së, dhe deputetët s’kishin rrugë tjetër pos ta realizonin këtë, qoftë me votim të hapur, të fshehur, apo çfarëdo forme tjetër”, ka shkruar ai, duke shtuar se në vitin 2020 Kushtetuesja bëri një kthesë.
“Në vitin 2020, Gjykata Kushtetuese bëri kthesë dhe e ndryshoi pikën 1, kur i dha të drejtë Presidentit asokohe që të mandatonte një qeveri pa fituesin brenda, sepse fituesi ishte Lëvizja Vetëvendosje. Në vitin 2025, kësaj radhe në disa akte, Gjykata Kushtetuese përsëri bëri kthesë edhe për pikën e dytë, ku tash e thotë se vetëm votimi i hapur është i vlefshëm, dhe madje vendos edhe kufizim në vetëm 3 tentime, sepse fituesi është Lëvizja Vetëvendosje. Kjo e fakton padyshim se vendimet e kësaj Gjykate nuk bazohen në Kushtetutë, por bazohen në atë se cila parti është në pyetje. Kjo nuk është drejtësi. Ky është arbitraritet klientelist, që synim ka t’ua sigurojë gardës së vjetër në tavolinë, atë çfarë nuk ua dha populli me votë”, ka shkruar ai.
Pas tij, Kushtetuesja është kritikuar edhe nga deputeti Armend Muja dhe deputetë të tjerë.
Por, më e ashpra në sulme ishte komisarja e VV-së, Dejona Mihali.
Ajo ka linçuar me rend të gjithë anëtaret e aktual të Gjykatës Kushtetuese.
Në profilin e saj në “Facebook”, ajo pretendon se të gjithë gjyqtarët kanë lidhje me partitë e opozitës dhe Listën Serbe.
“Njoftimi që i paraprin Aktgjykimit të Gjykatës Kushtetuese normal që nuk mund të jetë ndryshe nga mendimi dhe interesi i përbërjes së Gjykatës. 5 nga 7 anëtarët janë ish koalicioni PAN+Lista Serbe të zgjedhur në 2018. Asnjë njeri me mendje të shëndoshë nuk do të priste diçka tjetër prej tyre. Nexhmi Rexhepi – Kryetar, i zgjedhur në 2018. I sponzorizuar nga AAK dhe ish kryeministri i asaj kohe Ramush Haradinaj. Safet Hoxha – Nënkryetar, i zgjedhur më 2018. Kryetar i KRPP (organ kontrollues i prokurorimit publik) 2010-2018. I sponzorizuar nga PDK e Nisma. Asambleist i PDK në Kuvendin komunal të Suharekës”, ka shkruar Mihali, duke përmendur edhe gjyqtarët tjerë.
“Bajram Latifi – anëtar i zgjedhur në 2018 i sponzorizuar nga Duda Balje si pjesë e komunitetit boshnjak. Radomir Laban – anëtar i zgjedhur me 2018 i sponzorizuar nga Lista Serbe i mbështetur nga PAN. Remzie Istrefi Peci – anëtare e zgjedhur më 2018 e sponzorizuar nga koalicioni PAN. Enver Peci – anëtar i zgjedhur më 2022 i votuar nga të gjitha subjektet parlamentare Jeton Bytyçi – anëtar i zgjedhur në 2024 i votuar nga të gjitha subjektet parlamentare”, ka shkruar Mihali.
Në linje më të ka shkruar edhe deputetja e VV-së, Saranda Bogujevci
Në profilin e saj në “Facebook”, ajo pretendon se demokracia përfaqësuese është anuluar sot.
“Demokracia përfaqësuese u anulua në Kosovë dhe nuk vlen më. Kot i fiton zgjedhjet, kot del i pari. 6 gjyqtarë, nga të cilët 5 nga koha e PAN-it dhe njëri i lidhur me Serbinë, shkelin vullnetin e popullit, riinterpretojnë vendimin e vet dhe gjejnë shkelje veçse te Avni Dehari”, ka shkruar Bogujevci.
